Tribal Research Institute-in lehkhabu Hralhna atangin Rs.1,99,107 an hmu

Art & Culture department hnuaia Mizo chanchin lehkhabu pawimawh tak tak Mizo ṭawng leh Sap ṭawnga chhuah ṭhintu Tribal Research Institute (TRI) chuan kum kal ta chhung khan lehkhabu 1,698 an hralhna
aṭangin Rs. 1,99,107 an hmu a; Mizo history lehkhabu pawimawh tak tak chhut nawn theih loh 20 an nei mek.

TRI hotute chuan, kum kal ta chhung khan lehkhabu 1,698 an hralhna aṭanga an hmuh Rs 1,99,107 chu sorkar sum báwmah an chhûng lut tih an sawi a; TRAI chu khualzinte leh university-a research scholar-te'n an tlawh
ṭhin thu te, an hmang ṭangkai viau rualin, Mizo ṭhalaite'n Mizo History ngaihven nan an pan tam tawk loh thute Vanglaini an hrilh.

TRI senior reasearch officer Zaliana chuan, hnam rilru pu turin history hriat chian a ngai tih sawiin, "Mizote hi tute nge kan nih tih te, mahni history pawh hre chiang tâwk lo kan tam vangte hian engtin nge kan hma lam hun kan thlir thiam theih ang? Hengte avang hian hnam rilru pu tak tak tur chuan ṭhalaite hian Mizo History kan hriat a ngai a ni," a ti.

Zaliana chuan, TRI aṭanga lehkhabu hlui ṭha tak tak leitute leh anmahni tlawhtute chu kum upa lam leh thu leh hla lama tui mi te, History Association te, Writers Club leh MAL leh university lamte an nih thu a sawi a; an lehkhabu siamte chu hlêp leh hloh nei chuang lo tura siam a nih ṭhin avangin a man pawh a tláwm tih a sawi bawk.

TRI hian lehkhabu chhuah theih loh 20 neiin, sum awm loh vanga chhut nawn theih lohte a ni hlawm a; chu'ng zinga ṭhenkhat chu kum 30, 20 leh 10 liam tawha an chhutte a ni. TRI hian kum 2012 khan lehkhabu 'Mizo Lalte' tih chu an chhu hram a, chu bakh chu a hnu lamah lehkhabu chhut thar an nei tawh rih lo.

Lehkhabu chhutna tur hi TRI chuan Ministry of Tribal Affairs-ah vawi eng emaw zat an dil tawh a, an la hlawhtling thei lo. Tunah hian North East Zone Cultural Centre-ah lehkhabu hlui ṭha tak tak 10 chhut lehna tur an dil leh mek. Kum 2009-10 khan Victoria Memerial Hall, Kolkata aṭangin lehkhabu pariat chhutna tur cheng nuai 10 an dawng a, chu bak chu sorkar laipui aṭangin dawn a awm tawh rih lo.

Sorkar aṭangin lehkhabu chhutna tur hi budget-ah non-plan hnuaiah Rs. 1,00,000 an dawng ṭhin a, lehkhabu pakhat hi copy 1,000 tal chhut a ngaih avangin an sum neihin a daih lo hle ṭhin tih an sawi.

TRI hian Art & Culture office leh Vanapa Hall hnuaiah chiah lehkhabu an zuar a, an hralhna man chu sorkarah an chhûng lut zel ṭhin. Tuna lehkhabu an chhut theih tawh loh zingah hian - 'Mizo pasalṭha huaisente' tih te, 'Mizo lal ropuite' tih te, 'Mizo thawnthu' tihte a tel a; sap ṭawnga ziak Mizo history pawimawh tak tak chuanna lehkhabute a tel bawk.