Rajiv Gandhi pian champha pualin seminar

Prime minister hlui Rajiv Gandhi pian champha vawi 72-na pualin Mizoram Pradesh Youth Congress Committee chuan August 20 khan Congress Bhavan-ah politics chungchang zirhona an buatsaih. Rajiv Gandhi pian champha pual hian India ram hmun hrang hrangah seminar buatsaih a ni.

Seminar-ah hian MPYCC treasurer F Lalhmangaiha'n Rajiv Gandhi-a'n ram tana hna a thawhte a tarlang a; Rajiv Gandhi thawhrimna azarah ṭhalai tam zawkin ram rorelnaa chanvo nei tura vote an neih theih nan vote nei thei kum 21 ni ṭhin chu kum 18-ah tihhniam a nih thu leh, state puitlinga Mizoram hlangkaitu a nih thu a sawi.

Rajiv Ratna Gandhi hi PM hlui, Indira Gandhi fapa upa zawk a ni a, August 20, 1944-ah a piang a, Indian Airlines-ah pilot a ni. Kum 1968-ah sap rama a lehkha zirpui, Sonia Gandhi nen an innei. A nu, Indira Gandh kum 1984-a kah hlum a nih avangin politics-ah a lut a, kum 1984-1989 chhung prime minister niin, India prime minister naupang ber a ni.