KHAWTHLIR

Mibo thiin hmu

January 13, 2025 aṭanga chin hriat loa awm Arun Chhetri (22) s/o Deepak Chhetri, Khuangpuilam, Kolasib chu January 15, 2025 khan ICAR, Kolasib-a hna thawkte'n an bawng vulhna bulah thiin an hmu a; Inrinni vek khan vui nghal a ni.

Area thar hawng

Chhandamna Kohhran (Salvation Church of India) chuan January 26, Pathianni khan Aizawlah area thar pahnih - Aizawl North Area leh Aizawl South Area an hawng. Aizawl North Area viltu tur Rev. Dr R Lalsangzuala leh Aizawl South Area viltu tur Rev. C Rualchungnunga te an dah nghet nghal bawk.

Larsap leh MHIP

Governor Gen. Vijay Kumar Singh chuan nimin khan MHIP Gen. Hqrs hruaitute Raj Bhavan-ah a kâwm a, thil chi hrang hrang a sawipui. Inkawmnaah hian MHIP president Ngurmawii Sailo leh office bearer dangte an tel a ni.

Kawng khâr dawn

Khatla Ring Road siam a nih dawn avangin Nursery Veng péngṭhuam leh Khatla bazar péngṭhuam inkar kawng chu vawiin aṭanga January 31, 2025 thleng zing dar 9 aṭanga tlai dar 4 inkarah khàr ṭhin a ni dawn. Hna thawh chhungin hna thawhna huam chhungah lirthei dah phal a ni lo.

Kuhva phurh khap

Serchhip district magistrate Paul L Khuma chuan Bharatiya Nagarik Suraksha Sanita, 2023 Section 163 tlawhchhanin thupek a chhuah a, Serchhip district-ah dan loa kuhva lak luh leh phurh khap a nih thu a puang. Serchhip district chhungah dan phal loh kuhva phur lirthei an kal ṭhin tih hriat a nih thu a tarlang a ni.

DC-ah thehluh tur

Serchhip Bawrhsap chuan hriattirna chhuahin, Home department-in 'Approved List of Mizoram Gorkhas, 2021' a tihchhuaha hming chuang, siamṭhat ngaite chu felfai zawka lehkha a kal theih nan DC hnenah dilna thehluh tawh tur a nih thu a tarlang. Dilnaah voter identity card, Aadhar card, birth certificate leh mahni awmna VC-te hriatpuina lehkha thil tel tur a nih thu a tarlang bawk.