July 1-ah parking fee tisang dawn
Aizawl khawpuiah July 1, 2015 aṭangin motor parking fee tihsan a ni dawn. Aizawl Municipal Council (AMC) chuan Aizawl khawpui chhunga mipuite chêtvelna awlsamna a nih beiseiin city bus chak zawka tlân tur 'Green Line Express' siam a tum.
AMC executive councillor (Parking) Rosiamngheta chuan nimin khan Aizawl Press Club-ah thuthar thehdarhtute kâwmin, parking fee tihsan a nih tur thu hi a sawi a, "Parking fee tihsan a nih chhan chu lirthei a chhuah tlem beisei vang a ni. Chhiah lak duh vang ringawt a ni lo a, zalen taka mipui an chêtvel theih nan leh mipui him nan a ni," a ti.
Parking fee pe duh lo chuan parking area-ah lirthei an dah tur a ni lo tih sawiin, "Parking fee pe duh lote chu parking fee khawntute'n police-ah an hriattir thei ang a, an motor hnuh/khaitir ṭhin tura ruahmanna siam a ni," a ti a; parking fee chungchanga complaint duh chuan parking receipt nen complaint theih a nih thu a sawi.
Revenue changtu AMC Executive Councillor sawi danin, sorkar office-te pawh an ram chin páwn lama lirthei an dah a nih chuan parking fee an pe tur a ni a; zirlaite chu an zirna-in aṭanga ft. 300 huam chhungah chuan student ID hmangin parking fee a zatve (50%)-a tlem chawitir an ni ang.
Sumdawnna lirthei - city bus, line bus, taxi, maxicab, LPK leh pick up-te chuan an stand fee an pe ṭheuh tur a ni a, a pe lote chu stand-ah din phal a ni lo.
Parking fee punna hi tuna hman mek aṭanga chhûtin darkar khat huam chhungah chuan a lêtin a pung a; darkar khat leh a aia rei lo dinin two wheeler tan Rs. 10 leh LMV tan Rs. 20 chawi a ngai tawh ang. Hmun lûn lai bik (hot zone)-ah chuan darkar khat hnu lamah hmun dang aiin lirthei dah man a pung chak dawn a ni.
Zana kawngpui dunga lirthei dah man pawh siam a ni a, local council enkawl tura ruahman a ni. Kawng dunga lirthei dah man pawh hi category pathumah ṭhen a ni a, thla khat atan zel rate siam a ni.
Category-A ah LMV tan Rs. 600 leh two wheeler tan Rs. 250, category-B ah LMV tan Rs. 400 leh two wheeler tan Rs. 150, category-C ah LMV tan Rs. 250 leh two wheeler tan Rs. 50 a ni ang. (Phek 2-ah chhunzawm a ni)