CM-in central fund 90/10 nise a duh thu Swachh Bharat meeting-ah a sawi chhuak

Swachh Bharat Mission hnuaia Sub-Group chu nimin khan Bengaluru-ah an ṭhukhawm a, chief minister Lal Than­hawla pawh telin, sorkar laipuiin state hnena fund a pek chhuahah 90% tum se a duh thu a sawi.

Meeting hi Andra Pradesh chief minister Chandra Babu Naidu-a'n a kaihruai a; Mizoram CM Lal Thanhawla chuan, "State rethei, hmarchhak state-te'n faina beihpui thlakna atan sum kan nei lo. Central sorkar aṭanga ṭanpuina sum pek dan hi 90:10 ni se. Hengte bakah hian private sector leh Central public sector undertaking (PSU)-te'n mission hi zau zawkin kalpui se, Corporate Social Responsibility (CSR) aṭangin a lo berah 50% tal hmang thei se," a ti.

Chief Minister chuan, Sixth Schedule area hnuaia local body-te tan 14th Finance Commission-in sum a dah lo tih a sawi a, Central sorkarin sum dah ngei theihna atan Sub-Group hian rawtna thlen se a duh thu a tarlang.

CM Hawla chuan, "Faina beihpui thlak hlawhtling tur chuan mipuite zau zawka hriattir a, anmahni tel ve ngei­na tura kalpui a ṭul. Senso tur sum pawh Cen­tral sorkarin hnianghnâr taka pein, faina changchangah primary school level aṭanga zirlai naupangte zirtir a ṭha a, chu chuan faina beihpui thlak hlawhtlinna tur thui tak a hril thei a ni," a ti.

Chief Minister hian Thawhlehni khan Bengaluru-a Mizoram House sakna tur hmun Karnataka sorkarin Mizoram sorkar hnena a pek chu a hmunah a en a ni.