KHAWTHIR

Police hmun en
Additional DGP Thianghlima Pachuau chuan nimin khan Lunglei khawpui chhunga police hmun pawimawh hrang hrang - Lunglei Police Station, DIG(SR) Office, Lunglei SP Office, SDPO Office, MPRO leh 2nd Bn MAP Luangmualte a tlawh a; Lungleiah police station thar sak a nih tur thu a sawi.

Kum 109 mi thi
Kum 109 mi, T Chiadi w/o B Heiko (L), Tuipang, Saiha district chu nimin zing dar 6 khan Tuipangah lungphuchâwlin a thi. T Chiadi hi Mizorama upa ber pawl nia hriat a ni a; kum 1906-ah Zawnglingah a piang nia sawi a ni. Kum 1933-ah B Heiko nen an innei a, fa pakua an nei a, tu leh tuchhuan 98 an nei bawk.

Minister Delhi-ah
UD&PA minister Zodintluanga chuan nimin khan New Delhi a pan a, Atal Mission for Rejuvenation and Urban Transformation tlangzarhna inkhawmah a tel ang a, Ministry of Urban Development leh DoNER hotute a dâwr bawk ang.

LC ko khawm
Aizawl Municipal Council chuan vawiin chawhma dar 11 hian AMC Office, Ṭhuampuiah Aizawla local council tin chairman leh secretary-te a ko khawm a, motor parking leh parking fee chungchanga hmalakna thar ruahman mekte a hrilhfiah dawn a ni.

Kawng chhia en
Lunglei khawpui kawngpui siam ṭhat ngaite bawhzui tura din, Internal Roads Committee chuan nimin khan an chairman, Lunglei DC Ashish Madhaorao More hoin Lungleia kawng chhe zual laite an enfiah.

NLUP sem
Soil & Water Conservation department chuan nimin khan Thingsai, Arthur, Tarpho leh Lungmawi khuaa NLUP hnuaia coffee chìn thlangtu chhungkaw 44 hnenah Rs. 64,400 leh coffee ṭiak 1,000 ṭheuh an sem a; hmunphiah thlangtu chhungkaw pakhat hnenah Rs. 26,600 an pe bawk.