CWC-in case 1,411 chingfel

Child Welfare Committee (CWC) chuan kum 2014-15 chhung khan thubuai 1,488 an nei a, chung zinga 1,411 chu an chingfel hman a, chinfel hman loh 77 an nei.

Mizoram State Child Protection Society (MSCPS) hotute'n Vanglaini palai zawhna chhanga an tarlan danin, CWC-in April 2014 - March 2015 chhunga case a neih 1,488 zinga 1,440 chu case thar a ni a, 48 chu kum hmasa 2013-14 chhunga chinfel hman loh a ni. Case 1,488-in a kaihnawihte chu mipa 795 leh hmeichhia 693 an ni.

Kum 2014-15 chhunga CWC case hi kum 2013-14 chhunga case an neih zat 346 aiin a let liin a tam zawk a, a inthlauhna chu 1,142 a ni. Kum 2013-14 chhunga case an neihte chu mipa naupang 328 leh hmeichhe naupang 18 a ni a; case zinga 304 (mipa 286 leh hmeichhia 18)-te chu an chingfel hman. Kum 2012-13 chhungin case 423 neiin, chung zinga 331 chu an chingfel.

CWC-in kum 2014-15 chhunga case a neihte zingah hian pawngsual mipa paruk leh hmeichhia 72, an vaiin 78 an tel a; khuaikhem (molested) tâwk mipa panga leh hmeichhia 53, an vaiin 58 an tel.

Heng bakah hian, fahrah châwmna ina awm 22, naupang thlahthlam (destititute/neglect) 177, mi duh loh (abandoned) 22, enkawl duh loh vanga mi dang hnena hlan (surrendered) 44 leh, nu leh pa enkawltu ṭha nei lo (unfit parent) 140, child marriage pakhat, child labour 10, rûkbo 16 an tel bawk.

CWC chuan kum 2014-15 chungin naupang harsatna nei thubuai 1,488 zinga 1,411 an chingfel hman a, heng zingah 358-te hi chhungte hnena dah kir an ni. Thubuai chinfel dangte chu - children home-a dah 339, state danga home-a dah pahnih, residential school-a admit 37 leh thil dang 574 a ni.

Zawhna chhangin MSCPS hotute chuan, danin a sawi angin home-ah professional counsellor awm ngei tur tih chu Mizoram chhunga home hrang hrangte'n an zâwm tawh. Home-a thawk professional counsellor bikte chu sorkar (MSCPS)-in hlawh an pe.

Mizoram pumah MSCPS pawm­pui naupang enkawlna home 44 a awm a; Aizawl district-ah 22, Lunglei district-ah paruk, Saiha district-ah pathum, Lawngtlai district-ah pahnih, Serchhip district-ah pahnih, Champhai district-ah pathum, Kolasib district-ah panga leh, Mamit district-ah pakhatte a ni.