Trade & Commerce-in cheng nuai 1300-in New Market-ah sa zawrhna in an sa dawn
Aizawl New Market-a sa dawr ṭhiah tâk sak ṭhatna tur project, cheng nuai 1300 hù chu North Eastern Council (NEC)-in a pawm tawh tih Trade & Commerce department hotute chuanan sawi.
Sa dawr sak ṭhatna tur sum zinga 90% (nuai 1170) chu NEC-in a tum ang a, Mizoram sorkarin 10% (nuai 130) a tum ve thung ang.
New Market-a sa zawrhna in sakna tur hian NEC chuan June 16, 2015 khan first instalment cheng nuai 468 a rawn pe tawh a, sum hi kum 2015-16 chhunga hman tura tih a ni. Zawhna chhangin Trade & Commerce department hotute chuan, sa dawr sak ṭhat tur chu chhawng kua tur a ni a, a pumpui zau zawng chu sq.metre 7807.2 tur a nih thu an sawi.
Sa dawr sak ṭhat turah hian inkhai chhohna (lift) a awm ang a, wheelchair-a kal theih tura siam a ni bawk ang. Mipuite zunram thiarna tur chhawng tinah siam vek tura ruahman a ni.
Trade & Commerce department hotute chuan Mission Veng Bazar pawh NEC sum hmanga sak ṭhat thuai tur anih thu an sawi. Mission Veng Bazar building sak nan cheng nuai 598.41 ruahman a ni a, first instalment an dawng tawh. Sum chu NEC-in 90% a tum ang a, Mizoram sorkarin 10% an tum ang.
Vairengte Bazar pawh sak thuai a ni dawn a, a satu tur contractor thlan fel tawh a nih thu department hotute chuan an sawi. Vairengte Bazar sak nan hian cheng nuai 387.67 pawm a ni a, first instalment cheng nuai 139.55 an hmu tawh. Hei pawh hi state sorkarin 10% a tum ang a, NEC-in 90% a tum dawn a ni.
Trade & Commerce dept hian market hrang hrang an enkawl aṭangin kum 2014-15 chhung khan Mizoram sorkarah revenue Rs. 1,54,24,770 an chhung lut a, an target Rs. 1,47,00,000 chu Rs. 7,24,770-in an khûm.
Mizoramah market 225 a awm a, chung zinga 25 chu T&C department-in an enkawl a, a dang 200-te chu local council leh village council-te leh T&C department ṭangkawpa enkawl a ni.