Zirna kalphung thar duan tur sawiho

Sorkar laipuiin New Education Policy duan a tum mek chungchangah nimin khan NERIE, Shillong chuan SCERT Auditorium, Aizawlah inràwnkhawmna an buatsaih a, School Edu­cation secretary Manisha Sa­xena-i'n a hmanpui.

Manisha Saxena chuan, zirlaite tan zirlaibu chhung bakah, khua leh tui ṭha ni tura ngaihtuahna an hman thiam theihna tur ngaih pawimawh a ṭul thu sawiin, "Zirna hian hmun zau taka an tih theih thil zirte an thiamna bakah, anmahni'n hriatna zau zawk an neih theihna turin rawtna ngaih­tuah siam tur tel ni se. Eng­kim hmachhawn thiam tura naupangte thuam ṭhat a ngai a ni," a ti.

Consultation meet­ing-ah hian Institute of Advance Studies and Education-a thawk te, university leh college zirtirtu te, School Edu­cation directorate-a deputy director leh a chung lam te, DEO leh SDEO te, SCERT-a officer te, RMSA leh SSA officer-te leh DIET principal-te an tel.

Sorkar thuchhuah tarlan danin, kum 1986 khan sorkar laipuiin National Policy on Education a siam a, chu chu kum 1992-ah siam danglam a ni. Zirna kalphung ṭha zawk siam tumin sorkar laipui chuan National Education Policy duan a tum a, state hrang hrangah inrawnkhawmna buatsaih chhoh mek a ni.

Zirlaite an mamawh thiamna leh hriatna pek leh science, technology, academic leh industry-a mihring indaih lohna tibo a, India ram chu hriatna chungchuang neihtir tuma hmalak mek a ni.

Consultation-ah hian sawiho tur thupui hlawm l33 a awm a, chungte chu hlawm hnih - School Education-a hman tur leh Higher Education-a hman turahte ṭhen a ni.