July 1-ah parking fee tisang dawn

Zawhna chhangin AMC hotute chuan, "Zan lam parking fee chu loh theih loh vanga kawng dunga lirthei dah ngaite tana ruahman a ni. Local council-in ruahmanna an siam angin kawng dungah hian zanah lirthei dah theih a ni ang," an ti.

Aizawl khawpui chhunga mipuite chetvel awlsamna zawkna turin bus 'Green Line Express' siam tum a ni a, Aizawl City Bus Owners' Association (ACBOA) nen hma an la mek tih sawiin, " July 13, 2015-ah tlantir tum a ni a, AMC Board of Councillor pawhin a pawm tawh. A chuan man tur chu ACBOA-ten an rua­hman ang," a ti a; city bus pangngai aiin chuan man a to deuh tur thu a sawi.

Ruahmanna an siam dan chuan, Green Line Express atan hian city bus pangngai tho hman an ni dawn a, city bus-te a inchhawkin an tlan ang. Ngaizel aṭanga Zemabawk inkarah stand parukah chiah a awm dawn a, city bus pangngai aiin a rang zawk tura ngaih a ni. Hetih lai hian, city bus pangngaiah chuan stand 20 chuang a awm niin an sawi.

AMC hotute chuan chuan taxi stand thlan bikah taxi tlân lai koh luhna tur 'Taxi Waiting Zone' siam an tum thu leh kudam lian tak tak neite chu khawpui pawna sawn tura an ngen thu an sawi bawk.

AMC hotute chuan, maxicab-te chu an stand aṭangin an chhuak tur a ni tih an sawi nawn a, "Counter licence hnungah counter bulah pick-up leh dropping phal loh a nih thu chiang taka ziah a ni," an ti.