Bio-fertiliser laboratory din tum a ni SEDP aṭangin cheng nuai 125 hmu
Mizoram sorkara Agriculture department chuan bio-fertiliser laboratory din tumin hma a la mek a; a dinna turin Socio Economic Development Programme (SEDP) aṭangin cheng nuai 125 hmuh tur an neih zingah mamawh zualpui atana hmalakna turin cheng nuai 98.7 an dawng tawh.
Agriculture (Research & Extention) director Dr H Saithantluanga chuan, SEDP aṭangin bio-fertiliser laboratory dinna tur cheng nuai 125 pawmpui a nih tawh thu leh kum 2020 chhunga hmalakna turin cheng nuai 98.7 an hmuh tawh thu Vanglaini palai a hrilh a; laboratory chu Mizoram University-a Bio-technology department leh Council of Scientific and Industrial Research (CSIR) - North East Institute of Science and Technology (NEIST), Jorhat-te nen ṭanghoa din tum a nih thu a sawi.
Dr H Saithantluanga chuan, Mizoramah state páwn aṭanga lak luh leiṭha (fertilizer) hlîr hman ṭhin a nih thu sawiin, "Mizoram leilung nen a inmil lo fo. CSIR-NEIST technology leh MZU mithiamte hmangin Mizoram chhunga kan neih sa bacteria-te hi lak chhuaha tihpun leh hlâwk zawka hman dan kan zir dawn a ni," a ti.
Bio-fertiliser laboratory tihpuitlin a nih chuan ṭhalaite tan hna a awm ṭeuh tur thu sawiin H Saithantluanga chuan, "Sorkar chuan laboratory a din ang a, production technology, quality control leh strain identify-te kan ti ang. A siam chhuah lam chu private entreprenuer-te kutah kan dah ang," a ti a; private entreprenuer-te siam chhuah chu hralh chhuah a nih hmain laboratory-ah an enchhin leh vek ṭhin tur anih thu leh bio-pesticide (bio-control laboratory) pawh changtlung zawk nei tura hma an lak dawn thu a sawi.
Agriculture (RE) Director chuan, Mizoramin ram leilung leh thlai hrisel a neih theih chu an tum ber a nih thu a sawi a, "Kan Minister-in chak takin hma min laksak a, kan lawm khawp mai. Kum li hnu velah chuan Mizoramin chemical fertiliser aiah bio-fertiliser mamawh tâwk hman tur a neih kan beisei," a ti.
Bio-control pathologist Dr Samuela chuan, MZU-a Bio-technology mithiamte'n Mizorama bacteria awm sate chu zir chiangin, tualchhunga hman atan a ṭha ber an zawn tur thu a sawi a, "Zir chian hun chhung erawh kum thum vel a ni dawn. CSIR-in patent technology an neih PO12 kan lei ang a, MZU Bio-technology department-a researcher-te zir chhuah kan hmang bawk ang," a ti. Bio-fertiliser laboratory chu Sihphir Neihbawi-a Agriculture department ramah sak a nih dawn thu leh a sakna turin cheng nuai 50 dah a nih thu te, MZU-a research beihna tur leh CSIR-in training an pekna tur sum pawh dah vek a nih tawh thu a sawi bawk.