ZPM sorkarin mipui an sáwr fû mek - MNF Vice President

MNF vice pre-sident Lalchhandama Ralte chuan, ZPM kaihhruai Mizoram sorkarin an theihna apiangah mipui an sáwr fû mek nia sawiin, mipuiin an ning tawh hle niin a sawi.

Lalchhandama Ralte hian nimin leh Thawhṭannia a bial chhunga khaw hrang hrang a fannaah thu a sawi a; VC inthlan awm turah MNF-in hnehna sâng tak chan tumin hma an lâk mek thu sawiin, "State-a rorelna changtu ZPM chu a thlang tlingtu mipuiin an ning ṭan mek," a ti.

MNF Vice President chuan, ZPM kaihhruai sorkarin chhiah chi hrang hrang a tihsan thu leh buhfai man a tihsan thu sawiin, "Sorkar kan hrawn mek hian chhiah hrang hrang an tipung a, harsatna hrang hrang kan tâwk mek a, a theihna apiangah mipui min sáwr fû mek a ni," a ti a; zirtirtu indaih lohnaah dah belh aiin, a awm chhunte sawn chhuah an ni zawk niin a sawi.

MNF sorkar laiin Mizoram chu ration buhfaiah a hnianghnar hle nia sawiin Lalchhandama Ralte chuan, "Dah hmasate a chhe hman ang tih hlauhawm khawp a ni ṭhin. Tunah chuan khuarel chhiatna rawn thleng palh thut ta se, ṭàm hmachhawn thei reng dinhmunah kan ding mek a ni," a ti.