Vaivakawn Bazar leh Tuikual lui kama kawng siamna tur sum a awm - Tetea Hmar

Aizawl West-II bialtu MLA Lalnghinglova Hmar, minister of state chuan nimin khan Vaivakawn YMA Conference Centre-a ZPM Aizawl West-II local council candidate-te inhmuhkhawmnaah thu sawiin, Vaivakawn Bazar leh Tuikual lui kam kawngpui siamna tur pawisa a thlen tawh thu a sawi.

Lalnghinglova Hmar chuan, Aizawl West-II bial chu sorkarin a duat hle nia sawiin, "Kum khat chhungin cheng nuai 4,500 chuanga thuam turin pawisa a dah tawh. Tuikual South aṭanga Dinthar thleng kawngpui thar Aizawl West Outlet tia hming vuah sialna turin SASCI aṭangin cheng nuai 2,000 pek kan ni tawh a, LC inthlan zawh veleh tender chhuah a ni ang a, kuminah hna kan ṭan dawn," a ti.

Aizawl tlâk lam mipuiin an chhawr tur Vaivakawn Bazar sak ṭhatna tur sum pawh a thlen tawh thu sawiin Lalnghinglova chuan, "Kan beisei aia rangin Vaivakawn Bazar sakna pawisa a lo thleng. December 6, 2024 khan sorkar laipuiin SASCI hnuaiah cheng vbc. 300 min pe a, chumi zingah chuan Vaivakawn Bazar sakna atan nuai 2,535 dah a ni. Restricted tender hmangin a thawktu tur PWD-in an thlang dawn," a ti a; utilisation certificate pek zung zung a ṭul avangin rang taka kalpui tum a nih thu a sawi.

Aizawl West-II bialtu MLA chuan, Vaivakawn-Mizoram University kawngpui siamṭhat hna thawh mek a nih thu sawiin, "A chhe zualpui hnawh mâm zawhah chhah ṭha taka bituminuous concrete hmanga chhûn khah vek tur a ni a, hna zawh thuai tum a ni," a ti.

Excise & Narcotics minister Lalnghinglova Hmar chuan, tun hmaa 'A senchi lane' tih ṭhin Vaivakawn Zohnuaia zu zawrhna hmunpui ni ṭhin chu Vaivakawn khawtlang nen ṭangrualin thenfai a ni tawh a, zu leh ruihhlo zuar an awm tawh loh thu a sawi.

Lalnghinglova Hmar chuan, LC candidate-te chu politics a nih tâk avanga insawichhiat chíng lo turin a chah a, "Mi dik lohna lam leh thawh ṭhat lohte en a ṭul ber lo a, thil ṭha tih tur lam kan thlir a ṭul," a ti.