Aizawlah TB Awareness Rally buatsaih

National TB Elimination Programme chuan Helen Lowry Higher Secondary School NSS unit nen ṭang dunin nimin zing kar khan ngawr chungchang inzirtirna atan TB Awareness Rally an buatsaih a, National Health Mission (NHM) mission director Dr Eric Zomawia'n a vailiam.

TB Awareness Rally hi Vaivakawn traffic point-ah ṭan a ni a, Helen Lowry HSS zirlai ṭhahnem tak tak telin, NHM Office, Dinthar thleng kawng zawh a ni.

Dr Eric Zomawia chuan, kum 2025-ah India ram aṭangin TB ûm bo tum a nih avangin ni 100 chhung awh tur TB zawn chhuah beihpui thlak mek a nih thu a sawi a, "Mizoramah chuan Aizawl, Champhai, Serchhip leh Mamit district-ahte kalpui a ni a, mipuite'n TB an vei nge vei lo hmuh chhuah a, enkawl vat chu he hmalaknain a tum ber a ni," a ti.

NHM Mission Director chuan, mi tam takin TB hrik an pai sa anga ngaih a nih thu sawiin, "Tunah natna a rawn thlen mai lo a nih pawn engtik hunah pawh TB natnaah a insiam thei. TB lan chhuah dante hriat chian a, a rang thei ang bera test vat ṭhin a pawimawh," a ti. Mei zu mi, zu leh ruihhlo laka fihlim lo leh chawṭha tlachhamte'n ngawr an vei awlsam bik thu sawiin, zirlaite chu zuk leh hmuam laka fihlim tur leh chaw ṭha leh hrisel ei uar turin a chah.

Rally ṭanna inkhawmah state TB officer Dr Febiola Kharkongor chuan, Rally chu kum 2025-a India ram aṭanga TB ûm bo a nih theihna tura hmalakna 100 Days Campaign kalpui mek puala buatsaih a nih thu a sawi a; TB um bona tur thutiam sawi rual a ni.