Thawhhopuiah chanchinbumite sáwm

Serchhip district election officer Paul L Khuma, bawrhsap chuan nimin khan VC inthlanpui awm tur chungchangah chanchinbumite kâwmin, thawhhopuiah a sawm a; Serchhip district-a VC seat pasarihah ZPM candidate-te chuhtu awm loin tlinga puan an nih tawh thu a sawi.

Paul L Khuma chuan, Serchhip district-a VC inthlanpuia chuh tuma hming pe mi 698 zingah general seat chuhtu mi 524 leh hmeichhe seat (reserved) chuhtu mi 174 an awm thu a sawi a, "Candidate zawng zawng hian endikna an paltlang vek a, candidate tura pawm an nih hnuah mi 11 chu an inhnûkdâwk a, chuhtu awm loa tlinga puan mi pasarih an awm," a ti.

Serchhip Bawrhsap sawi danin, Serchhip district-a VC candidate, chuhtu awm loa tlinga puante chu Hmunzawl, Neihloh leh Chhuanthar Tlangnuama mite an ni a, ZPM candidate vek an ni.

Bawrhsap chuan, Serchhip district-ah inthlanna muanawm tak neih a nih ṭhin thu sawiin, "Vote tla zat pawh a sang ber pawl a ni ṭhin. Tun ṭum VC inthlanah pawh hian Mizoram puma vote tlak ṭhatna ber district nih tumin, 90% tlin ngei tumin ṭan i la ang u," a ti a; thawhhopuiah Serchhipa thuthar thehdarhtute leh mipui a sáwm a ni.