District MJA-te'n conference an hmang

Mizoram Journalists' Association (MJA), Siaha district leh Mamit district chuan nimin khan Annual Conference an hmang a, agenda lutte ngaihtuah a ni.

Siaha District MJA chuan Hraisua Hills, Siaha Tlapi-ah Annual Conference vawi 41-na an hmang a, Mara Autonomous District Council-a executive member K Chhuabei-a'n a hmanpui.

Mamit district MJA chuan Mamit Press Club-ah Annual Conference vawi 17-na an hmang a, Mamit IPRO Lalbiaknungi'n a hmanpui. IPRO chuan, thu dik leh ziktluak puan chhuah kawngah accredited journalist-te an pawimawh thu sawiin, "A ṭha zawnga mipui rilru hruai tur te, sorkar thâ tichaka khalh ngilna kawngahte kan thuziak leh chhuahte'n awmze thûk tak a nei thei a ni," a ti a, hmasawn tuma hna thawk zel turin a chah.

Mamit MJA president Lalhuma pawhin thu sawiin, print media-in tun hma angin ngaihhlut a hlawh tâwk tawh loh thu a sawi a, "Hei hi kan district mai ni lo, khawvel pum huap pawha chanchinbumite harsatna tawh a ni. Chutihrual chuan, chanchinbumi kan nih anga kan thuziak leh sawite hi mite'n an la ngaichâng a, kan hriatna leh finnate pawh tihpungin, taimak chhuah lehzual a pawimawh," a ti.