Minister Rinpuii leh MADC hotute inkâwm

Health & Family Welfare minister Lalrinpuii chuan nimin khan Mara Autinomous District Council (MADC) pisa a tlawh a, MADC hotute nen inkâwmin, MADC mamawhte theihtawpa ngaihvena hmalakpui zel a tum thu a sawi.

MADC CEM conference hall-a inkawmhonaah minister Lalrinpuii chuan, MADC hotute chu Siaha district mipui tan theihtawp chhuahpuiah a sáwm a, "In mamawhte theihtawpa ngaihvenin, hma lakpui zel che u ka tum a, project in thehluhte pawh ka bawhzuipui zel ang che u," a ti.

MADC chief executive member M Laikaw chuan Siaha district mamawh hrang hrang - District Hospital-ah doctor leh nurse indaih lohna te, ICU a taka hman theih a la nih loh thu te, Urban Public Health Centre chungchang te, Siahaa nursing school chungchang te, MCHP O-pi (Drop in centre) leh de-addict centre/rehabilitation centre leh pawimawh dangte a sawi a; hma lakpui turin Minister a ngen.

Inkawmhonaah hian MADC-a executive member-te leh MDC-te an tel a, Siaha district-ah rualkhai zawka hmasawnna a thlen theih dan turte sawiho a ni.