MNF MLA-te'n Lalduhoma Bân turin Speaker-ah an hêk
MNF party MLA-te chuan nimin khan ZPM Legislature Party (ZLP) leader Lalduhoma chu dan bawhchhiaa puhin, MLA aṭanga bàn turin Assembly speaker Lalrinliana Sailo an ngen. Speaker chuan dan anga hmalak a nih tur thu a sawi a; Lalduhoma chuan, dan bawhchhiat a neih loh thu a sawi thung.
MNF MLA-te chuan, Lalduhoma'n Indian Constitution 10th Schedule Para 2(2) a bawhchhia nia tarlangin, MLA a nihna aṭanga bàn (disqualify) turin Speaker an ngen. Lalduhoma chu independent ticket-in MLA atan thlan a ni a, MLA a niha a thil tih zawng zawngin party dang ZPM a zawma a lan avangin bàn turah an ngai a ni.
Ruling MLA-te chuan, Lalduhoma'n Indian Constitution 10th Schedule Para 2(2) a bawhchhe ngei nia tarlangin, "Hetiang bawk hian kum 2006-ah independent-a thlan tlin Haryana MLA Jagjit Singh chuan Congress party a zawm a, Speaker-in a lo ban tawh a ni," an ti.
Jagjit Singh chungchangah Supreme Court-in, miin party dangah member atan inziak lutin fee pe lo mah se, a taka a thil tih leh chêt danin chu party zawmna chu a taka a lantir a nih chuan chu chu thu tlingah a ngai a, Haryana Speaker-in Jagjit Singha a bàntirna a pawmpui niin MNF MLA-te chuan an tarlang.
Lalduhoma chu MLA atan independent ticket-a thlan tlin a nih laiin, a hnuah mipui vantlang hriatah ZNP party-in ZPM party thar zawmin an inchhûng lut vek tih a puang a; ZPM office-a inkhawmnaah ZPM party-ah mi a lawm lut niin an tarlang bawk.
Vanglaini palai zawhna chhangin Lalduhoma chuan, Anti Defection Law bawhchiaah a inngaih loh thu a sawi a, "Anti Defection Law chu miin anmahni thlang tlingtute an phatsana hman tura siam a ni a, kei chuan min thlang tlingtute ka phatsan lo," a ti.
Lalduhoma chuan, MLA inthlan hmain ZPM din a ni tawh tih sawiin, "ECI aṭangin registration kan la neih loh avangin independent chuan kan ding ngei. Hei hi India rama political party ding tharte tih dan a ni a, a hnuah an vote hmuh dan a ṭangin registration-te neiin recognise-te an ni ṭhin," a ti a; ZPM candidate-te chu common symbol, flag leh manifesto thuhmun vek an nih thu a sawi.
MLA candidate an nih dawnin ZPM-ah rinawm turin thu an tiam vek thu sawiin Lalduhoma chuan, "Anti Defection Law thil tum chu anmahni thlang tlingtu phatsantute hrem a ni. Chutiang chuan kei chuan ka ti ve lo. A ṭul chuan Court-in thu dik a hai lang ang," a ti.
Vanglaini palai zawhna chhángin speaker Lalrinliana Sailo chuan, thil thleng chu hrehawm a tih thu a sawi a, "Official-te'n dan an thlir ang a, dan ang zelin kan kal ang. Complaint thehluttute'n dan tarlan an nei a, chu'ngte chu uluk taka zir chian a nih hnuah thutlukna siam a ni ang," a ti a; dan an ngaih pawimawh ber tur thu a sawi.