STEE Rules hmang lo turin Court-in sorkar a hriattir
Mizoram sorkarin State Technical Entrance Examination (STEE) Rules-a a siam danglam (amended) chu Gauhati High Court-in hman theih rih loh turin a rel. Hei hian STEE 2015 result a nghawng dawn leh dawn loh hriat a la ni lo.
Thu dawn danin, kumina STEE Rules-a siam danglam chu Mizoram Chakma Students Union (MCSU) chuan ṭha ti loin Gauhati High Court-ah an khing. High Court Principal Bench chuan June 24, 2015 khan stay order a tichhuak. Hei vang hian STEE Rules-a siam danglam lai bik chu hman theih a ni hrih lo.
Vanglaini palai zawhna chhangin Higher & Technical Education (H&TE) secretary K Lalnghinglova chuan, Court thupek hian tun hnaia tihchhuak tak STEE 2015 result a huam dawn leh dawn loh an la hriat loh thu a sawi.
K Lalnghinglova chuan High Court-ah chhanna an pek tur thu sawiin, "High Court hi kar leh aṭangin an châwl dawn a, July 13, 2015-ah an kal leh chauh dawn. An kal leh hunah Court-in kan chhanna an ngaihtuah ang a, thil awm dan tur a chiang deuh ang. Kei ni chuan STEE 2015 result buai loh dan tur kan ngaihtuah a ni," a ti.
STEE-ah Chakma eng emaw zat an tlin avangin MZP chuan nikum khan lungawi lohna an lantir a, sorkar nen inremna siamin, STEE Rules chu siam danglam a ni. STEE Rules siam danglam chu April 23, 2015 khan Mizoram sorkarin gazetted-in a tichhuak.