Police kut aṭanga chhuh tum pawi ti

Mizoram Police Subordinate Officers Association (MPSOA) chuan thuchhuah siamin, June 18, 2015-a thlama Thingdawl nu pakhat pawngsualtua puh, police-in an man tawh hnua mipuiin police kut aṭanga chhuh tuma an nawr chu pawi an tih thu an tarlang.

MPSOA chuan, “Thing­dawl khuaa pawng­­sualtu police kuta awm tawh, mipui thinrim sâ­hâwkin lâk chhuah an tum vanga police-te bo­ruak beng daihna tura van lam hawia silai hmehpuah hial ngai khawpa dan lama mipuite kan la ṭhangharh lo hi a pawi kan ti tak zet a ni,” an ti a; police awm chhan ber chu mipui venhim leh misualte dan anga hrem a nih thu an sawi.

Police-te’n misualte chhanhim hrim hrim an duh vang ni loin, hrem turin an buatsaih zawk ṭhin tih sawiin, MPSOA chuan, “Kan ṭhiante’n an duty dik tak tia huaisen taka an tih tur an hlen hi kan chhuang takzet a, sorkar pawhin an phu tâwk lawmman a pek leh ngei kan ring,” an ti.

MPSOA tarlan danin, police kuta awm tawh misualte hmuh leh kutthlak tum luih vangin vawi tam tak police-in mipuite an hmachhawn tawh a, mipuiin sorkar bungrua eng emaw zat an tihchhiat tawh bakah, police leh mipui zinga hliam tawrh phah hialte pawh an awm tawh ṭhin.

Misualte donaah ṭan­rual a ṭul laiin, mipuiin police an tâwng chiam ṭhin a, misualte an kèl-é-àwl hlauh ṭhin tih sawiin, MPSOA chuan, “Mahni kuta dan kenkawh ve châk mi tlemtête’n mipui an fuihpawrh ṭhin vang a ni a, hriat lohna vangin mi ṭhenkhatte’n ṭul miah loah case an neih phah hial ṭhin a, a pawi em em a ni,” an ti. Mipuite chu ngaihtuahna fím tak hmang a, ṭul lo leh awmze nei loa buaina laka inthiar fihlîm turin an ngen a ni.