KHAWTHLIR
Thisen pe
Zanlawn Branch YMA chuan, YMA Day pualin nimin khan Synod Hospital thisen unit 14 an pe a, a petute mipa vek an ni. Synod Hospital-a damlo, awm man pe thei lo mi pakuate leibá an rulhsak bawk.
AMRUT-ah UD&PA Minister
UD&PA minister Zodintluanga chu nimin khan prime minister Narendra Modi-a'n New Delhi-a Atal Mission for Rejuvenation and Urban Transformation (AMRUT), Smart Cities Mission leh Housing for All a tlangzarhna inkhawmah a tel. Programme hi India rama khawpuite tihhmasawn leh tihthianghlimna tur niin, a pathum atan cheng vbc. 4,00,000 dah a ni. Smart city-in khawpui 100 tuam tur zingah Aizawl pawh a tel.
Police training
Nimin khan Lawngtlai district chhunga police-te tan Lawngtlai SP conference hall-ah ni hnih awh tur misual hnu chhui dan zirna buatsaih a ni a, Lawngtlai SP Lalringdika'n a hawng.
Savawmin seh
Nimin khan Hortoki aṭanga Tut lui thlen hma, Sumsi dung an tihah Mau sât tura kal Rinmawia, Rasdali khua chu savawm no hruaiin a seh a, a lú-ah hliam a tuar. Thu dawn danin, Rinmawia leh a ṭhianpa Lalrosiama, Hortoki-te mau sat tur chu savawm hian a bei thut a, Rinmawia a bawhbet nghal a ni. Lalrosiama'n a ṭhianpa hi chhanin, savawm lu-ah a sât a, chumi hnuah savawm chu a insaseng a ni.
BCM-in tanpui
Bungtlang khuaa rialin chenna in a den chhiatte ṭanpui nan BCM Relief & Developement department chuan June 23, 2015 khan Emergency Relief Fund aṭangin chhungkaw 120 hnenah rangva an sem.
Chhiah titawp
Aizawl Municipal Council chuan sorkar duh dan angin an huam chhunga mimal ram âwl aṭanga chhiah lâk a titawp dawn. Thudawn danin, ram âwl aṭanga chhiah lak tawh zawng zawng pawh pek kir leh vek a ni ang.