Mi panga thattu khaihlum phûtin Republic Veng mipuite'n kawng an zawh

Republic Veng mipui­te chuan Laltlan­chhuaha (37) s/o Parzuala, Republic Veng khai hlum phût­in nimin khan an veng aṭanga Aizawl District Court tual thleng kawng an zawh. Laltlanchhuaha hi January 9, 2015 zana Republic Venga chhungkaw pakhata mi pa­nga thattua puh a ni.

Republic Veng khaw­tlang hruaitute hnen aṭanga thu dawn danin, Laltlan­chhuaha hi nimin khan Court-ah inlan tura tih a ni a, chumi vang chuan dan anga a na thei ang bera hrem phûtin kawng an zawh a ni.

Kawngzawh hi Republic Veng Joint Action Committee huaihawt niin, T Romana College bul aṭangin chawhma dar 10:30-ah an ṭan a; Republic Veng mipuite bakah, Springfield Higher Secondary School zirlaite an tel.

Pi Pangi Pêng, Treasury Square leh Court tualahte an aurual a; Laltlanchhuaha chu khai hlum ngei an phut thu an aurualpui a ni. Court tualah resolution an pass bawk.

Hetih lai hian, Republic Veng mipuite'n kawng an zawh avang leh Court tuala an pun­khawm avangin Laltlanchhuaha chu nimin khan Court-ah hruai a ni lo nia thu dawn a ni.