Rualkhai zawka hlawh siam phûtin Sipai châwl tawhte'n kawng an zawh

Sipai aṭanga chàwl tawh, Mizoram Ex-Services League (MESL)-te chuan sipai pension hlawh rualkhai zawka siam phûtin nimin khan Zarkawt aṭanga Vanapa Hall kawt thleng kawng an zawh.

MESL president Col. John Zama chuan, sipai pension hlawh chungchanga an duh angte bawhzui kawnga Mizoram sorkar hmalaknaah an lawm thu a sawi rualin, sorkar laipui laka an lung­awi loh thu a sawi a, "One rank, one pension hi kum 30 chuang kan nawr tawh a, tun thlengin a la hlawhtling thei lo a, a hlawhtlin thuai kan phût a ni," a ti.

Parliamentary secretary Lt.Col ZS Zuala pawhin thu sawiin, sorkar laipuia thuneihna chang mektu BJP chuan inthlan dawnah 'One rank, one pension' chu tihhlawhtlin an tiam tih sawiin, "Tunah hian chu an intiamna tihlawhtling turin bá kan dil lêt mai a ni," a ti a; an thil nawr chu a hlawhtlin chuan Mizoram economy pawhin a ṭhat phah an beisei thu a sawi.

Sipai châwl tawhte hian sipaia an ṭan laia an thlen chin rank inanga awmte pension hlawh inang lo zunga a awm chu an duh lo a, rank inanga awmte chu hlawh inang pek an phût a ni. Kawng an zawhnaa an thupui ber pawh, 'One rank, one pension' tih a ni.

MESL hian member 6,200 vel an nei a, sipai nupui leh an chhungte nen chuan mi 25,000 vel an ni.