Covid-19: Mizoram dinhmun Hripui vei 106 hmuh belh a ni

September 21, Thawhṭanni khan Mizorama Covid-19 vei mi 106 hmuh chhuah a ni a, ni khata hripui vei hmuh chhuah tam ber dawttu a ni. Mizorama hripui vei hmuh chhuah tawh zat chu mi 1,691 a ni a; nimin khan mi 11 chhuahtir an ni thung.

Thawhṭannia Covid-19 vei hmuh chhuahte chu Zoram Medical College laboratory-a hmuh chhuah mi 107 leh Rapid Antigen Test hmanga hmuh chhuah pakhat an ni a, Aizawl district vek an ni. An zingah nausen thla 2 mi, Sawleng khua a tel a, Mizorama hripui vei hmuh tawh zingah a naupang bera hriat a ni a, a hmain Chaltlang Lily Venga nausen thla 3 mi postive hmuh a lo ni tawh.

September 21 hi Mizoramah ni khata Covid-19 vei hmuh chhuah tam ber dawttu a ni a; hmuh chhuah tam ber ní, September 9, 2020 khan positive mi 141 hmuh chhuah a ni. Nimin khan Covid-19 vei dam tawh mi 11 chhuah­tir an ni a; Thing­dawl CCC aṭangin mi pariat, Siaha CCC aṭangin mi pahnih leh Kolasib DCHC aṭangin mi pakhat an chhuak a ni. Covid-19 vei hmuh chhuah tawh mi 1,691-te chu mipa 1,374 leh hmeichhia 317 an ni a; an zinga mi 1,023 (60.50%) chu chhuahtir tawh an nih laiin, mi 668 (39.50%) chu enkawlna hmunah an la awm.

La chhuak lo zingah hripui vei tawh lo an awm nual bawk.Hetih lai hian, Bawngkawn LTF hruaitute chuan an vengah Covid-19 positive mi 38 hmuh chhuah a nih dan chu mak an ti deuh nia thu dawn a ni. Bawngkawn LTF chairman K Lalrinawma sawi danin, September 16-a swab sample lâkte chu September 20-ah endik a ni a, chu chu September 21 zingah result an hria a, hripui vei hmuh an awm lo.

September 16-ah hian Bawngkawn YMA Hall-ah mi 96-te sample lâk a ni a, September 21-a result chhuaka tel lo mi 43-re result chu nimin zingah a chhuak a, mi 43 zinga 38-te chu an positive a ni. Mi 38-te chu sample laknaa chhinchhiahnaah an serial number pawh a indawt deuh vek niin an sawi.

Sorkar thuchhuah chuan, September 21 khan ZMC laboratory-ah RT-PCR hmangin mi 759-te swab sample endik a ni tih tarlangin, "Pooled sampling method kalpui a ni a, positive an tam hian positive awmna pool-a sample zawng zawng a mal tê têa test a ngaih leh ṭhin avangin sample test hman zat ni dang aiin a tlem a ni," a ti.

ZMC-a Covid-19 positive hmuh chhuah tharte chu mipa 72 leh hmeichhia 34 an ni a, September 14, 15, 16, 17 leh 20-a swab sample lâkte a ni. An zinga mi 92 chu Aizawl khawpui huam chhunga mi an ni a, mi 14 chu Aizawl district-a khaw palia mite an ni. Hnam dang eng emaw zat an tel.

Rapid Antigent Test hmanga hripui vei hmuh chhuah pakhat a awm a, Chhinga Venga mipa kum 35 mi niin, Covid-19 symptom a nei tih sorkar thuchhuah chuan a tarlang. September 21-a swab sample endik zat chu 1,905 a ni a; ZMC-ah sample 759, district pangaah TrueNAT-PCR hmangin sample 87 leh RAT hmangin district parukah sample 1,059 endik a ni.