Kum 2009 hnuah power tiller 913 pe tawh

Agriculture minister R Lalzirliana chuan Agriculture department hnuai­a Custom Hiring Centre thara hman tur tractor 12 lei tharte chu nimin khan New Secretariat Complex aṭangin a vai liam. Minister chuan, kum 2009 aṭang­in subsidy-in power tiller 913, mini power tiller 360 leh tractor 62 pek chhuah a nih tawh thu a sawi.

Agriculture Minister sawi danin, tractor pekte hi Custom Hiring Centre-a loneitu intélkhawm (society) an ni a, sorkarin man tlawm zawkin tractor leh hmanraw dangte a pe a ni. Custom Hiring Centre chu pasarih - Phaizau, Middle Phai­sen, Kaihzawl, Zawlpui, Lumtui, Phaidung-I leh Ngengrualahte a awm mek a, 40 neih belh tum niin, chung zinga 28 chu peihfel tawh a ni.

Agriculture (Crop Husbandry) director Dr C Lalzarliana sawi danin, Custom Hiring Centre hi kum 2014-15 chhunga RKVY leh Sub-Mission on Agricultural Mechanization (SMAM) hnuaia hmalakna a ni a; RKVY hnuai­ah centre 36 leh SMAM hnuai­ah centre pali a awm. RKVY-ah nuai 342 leh SMAM hnuaiah cheng nuai 38 hman a ni a, centre pakhat atan cheng nuai 10 zel ruahman a ni.

Custom Hiring Centre thar din tum dan chu, RKVY hnuaiah Aizawl district-ah pathum, Lung­lei district-ah pali, Saiha district-ah pahnih, Champhai district-ah pali, Kolasib district-ah pali, Ser­chhip district-ah pahnih leh Mamit district-ah pa­hnih a ni. SMAM hnuaiah Aizawl, Champhai, Kolasib leh Serchhip district-ah pakhat ṭheuh dah tum a ni bawk.