MZU-ah media chungchang zirhona nei

Mizoram University-a Department of Mass Communication chuan, nimin khan MZU Administrative Conference Hall-ah 'Media and the marginalised' tih thupui hmangin national seminar an buatsaih a; MZU vice chancellor Prof. R Lalthantluanga'n a hawng.

MZU Vice Chancellor chuan, media chu khaw­tlang nunah a pawimawh hle tih sawiin, "Phai lam media-te'n hmarchhak lam hawi an tarlanin, a chhe lam an tilang nasa ṭhin. Hei vang hian mi­pui­te pawhin a chhe lam vek thleng angin an hmu fo. Media leh mipui hian a chhe lam leh ṭha lamin nghawng an nei thei a, fimkhur a ngai hle," a ti a; thil ṭha lam phochhuah tam a ṭul thu a sawi.

Seminar-ah hian MZU Mass Communication department HoD Dr V Ratnamala-in inlawmna thu a sawi a; Jamia Millia Islamia University-a Centre for North East Studies and Policy Research director Prof. Sanjoy Hazarika leh University of Hyderabad-a Communication department associate professor Dr P Thirumal ten paper an present.

Prof. Sanjoy Hazarika chuan, hmarchhak mite chu en hran an ni rêng em, tih zawhna awm thei a nih thu sawiin, en hran ni ta se, a mawhphurtuah media nge thil dang, tih uluk taka chhût a ngaih thu a sawi. Seminar hi vawiin ah chhunzawm a ni ang.