Mizoramah Corona Virus a la lut lo

Health & Family Welfare (HFW) department chuan thuchhuah siamin, Corona Virus chungchang an sawifiah a; China leh khawvel ram dang ṭhenkhata léng mek Corona Virus chu Mizoramah a la lut ve loa ngaih a nih thu an tarlang.

Corona Virus chungchang hi nimin khan Health department-a officer-te'n principal director Dr F Lallianhlira hoin a pisaah an sawiho a; epidemiologist Dr Pachuau Lalmalsawma, IDSP-a state nodal officer-in Corona Virus a sawifiah.

Health department thu-chhuah chuan, Corona Virus chu India ram leh Mizoramah a la lut ve loa ngaih a nih thu tarlangin, "Sorkar leh department-in theihtawp a chhuah mek a, Central lam nen pawh inbepawp rengin, a ṭul anga che turin HFW department pawh a inring reng a ni," a ti.

HFW department tarlan danin, Corona Virus natna hi ramsa aṭanga mihringin an kai ṭhin natna chi khat a ni a, hritlang satliah aṭanga natna hlauhawm zawk, Middle East Respiratory Syndrome (MERS-CoV) leh Severe Acute Respiratory Syndrome (SARS-CoV)-te a thlen thei. Corona Virus natna hi December 31, 2019 khan China rama Wuhan City, Hubei province-ah hmuh a ni a, China ram chhung hmun hrang hrang bakah, Thailand, Taiwan, Japan, South Korea, Australia leh USA-ahte a vei hmuh chhuah a ni tawh a, mi eng emaw zatin an thihpui tawh bawk.

Health department chuan, Corona Virus avanga chî-âi lo turin Mizoram mipui an chah a; a lèn nasatna ram, a bikin China-a Guangdong, Wuhan, Zhejiang, Shanghai, Beijing leh Tinjin province-te tlawh rih lo turin mipui an ngen a ni.

Corona Virus lan chhuah dan :

Thâwk lam harsatna, khawsik, khuh, thaw chham; a nat zual deuhin pneumonia, kal ṭha lo leh thihna a thlen thei.

Corona Virus laka invenna :

Tui leh sabawn emaw, alcohol based hand washing ang chia kut sil ngun.

Khuh leh hahchhiau laiin rawmawl hmangin hnâr leh hmai hup a ṭha.

Sa leh artui hmin taka chum chauh ei.

A vei nia rinhlelhte bula awm hnaih loh.

Ran leh ramsa hnaih loh.