State Day pualin ṭawngṭairual a ni dawn; Pathianah i innghat ang u – F Rodingliana

State Day of Prayer Committee-te chuan nimin khan Aizawl Press Club-ah thuthar theh­­darhtute kawmin, February 20, State Day-ah ṭawng­­ṭairual buatsaih a nih leh dawn thu an sawi.

State Day of Prayer Committee working chairman F Rodingliana, minister of state chuan, committee chuan nikuma an lo tih tawh angin kuminah pawh State Day puala ṭawngṭairual an buatsaih leh dawn thu sawiin, "Nikumah chuan sual sim thupha chawina hun buatsaih a ni a, kuminah chuan thupui atan 'I ram lo thleng rawh se' tih hman a ni dawn. Aizawlah chuan Lammualah hun hman tum a ni," a ti.

F Rodingliana chuan district khawpuiah chuan DC-te kaihhruaina hnuaiah kalpui a ni dawn tih sawiin, "Khaw hrang hrangte pawh kohhran bik sawi loin organising committee in dinin, State Day puala ṭawngṭairualna hun hi hmang ve ṭheuh se kan duh," a ti a, khaw hrang hrangah sawmnate pawh an la sem chhuah tur thu a sawi.

State Day of Prayer 2025 buatsaih turah hian Mizoram Kohhran Hruaitute Committee (MKHC) leh Council of Churches in Mizoram (CCM) te pawh biak rawn tawh a nih thu sawiin F Rodingliana chuan, "Kohhran hrang hrangte inpumkhatna nen, hmun khatah thupui pakhat hmanga Pathian au in kan ramin Pathian malsawmna tluantling kan dawn theih nan hmalak ho mek a ni," a ti.

F Rodingliana chuan Kristian ramah chuan central sorkara innghat loin Pathiana innghah chu an duh dan a nih thu sawiin, "Central sorkar hotute hmin thei chu Pathian a ni. A huhoa kan Pathian ram a lo thlen theihna atan theihtawp kan chhuah a nih chuan kan ramah malsawmna a lo thlen ngei kan beisei tlat," a ti a, project-te chu Pathian hnena ṭawngṭai chunga thehluh zel ni tawh se an duhthu a sawi.

State Day of Prayer Committee hruaitute sawi danin, State Day of Prayer hi kum 2024 khan lo hman tawh niin, kumin 2025 hian nasa zawkin ram pum huapa district tin leh khaw tinah ṭawngṭai khawmpui lian buatsaih turin ruahmanna kalpui a ni.

Aizawlah chuan chief minister Lalduhoma leh Fredrick Lalrindikate'n thu an sawi dawn bakah, MLA nei chin political party tinte chu ṭawngṭaipui an ngaihna lai ṭheuh thawh tura sawm an ni. Zaipawl Pui member 1,500 awmna din tura hmalak mek a ni a, hemi atan hian kohhran hrang hrang zaipawlte sawm mek an ni.

State Day pual vek hian kohhran hrang hrang ṭhalaite leh ṭawngṭai mite tan zan chanve ṭawngṭai buatsaih tum a ni a, a hun leh a kalphung tur erawh tihfel a la ni chiah lo. An programme buatsaih tur atan hian sorkar tihbuai a ni dawn loa, committee member-te thawh­khawm hmangin an kal mek a, a duh apiang tan phone number - 9436142870 ah g-pay hmangin pawisa thawh theih a ni.

Zawhna chhangin Committee hruai­tute chuan nikum lamah chuan sual thupha chawina hun hman a nih angin, saiip sin ngei ngei tura ngaihna deuh a awm thu sawiin, "Nikum lamah chuan saiip buaipuitu deuhte pawh in ruat a ni. Kuminah chuan saiip sin kher a ngai loa, a duh tan chuan sin theih a ni tho," an ti a, duh anga inchei theih a nih thu an sawi.