Lengpui Airport-ah kângṭhelh motor thar

Airport Authority of India (AAI)-in Lengpui Airport-a kâng ṭhelhna tur hmanraw thar a pek chu nimin khan thuthar thehdarthute hmaah pho chhuah a ni a, hnathawh dan tur an entir.

Lengpui Airport-a hman tur kângṭhelh lirthei dah thar hi pathum a ni a, Austria rama Rosenbauer siam niin, 'Rosenbauer Panther' tih a ni. Cheng nuai 350 vel leh nuai 430 man vel a ni. Tunlai thiamna hrang hranga thuam, tui leh kâng ṭhelhna atana hman foam-te pawh joystick anga a thununna siam hmanga kah chhuah leh hertir theih a ni.

AAI hotute sawi danin, ṭumhmuna thlawhna chesualah kângmei chhuak a awmin pilot-te'n Air Traffic Control Room an hriattir nghal ang a, Control Room-in airport fire sevice-te che chhuak turin an hrilh ve leh ang. Fire service team chu hrilh an nih aṭanga minute 2-3 chhunga an chetna tur hmun thleng hman ngei turah an ngai.

Kângṭhelh motor thar hian minute khat chhungin tui/foam litre 2,750 a phuh chhuah thei a, tui litre 10,000 a pai thei. A phuh thui theih zawng chu metre 90 tih a ni a, enchhin tawhnaah chuan metre 100 a phuh pha thung.

GAD (Civil Aviation) principal consultant Wg.Cdr. J Lalhmingliana chuan, AAI Act hman mekah AAI-in a tum ngei tur zingah safety service a tel tih sawiin, "Chumi hnuaiah chuan kangṭhelh motor pawh hi AAI-in a rawn dah a, min duhsak bik vang pawh ni loin, AAI-in a tum tur a nih vanga an rawn tih a ni," a ti.