Governor-in hmarchhak state pathum Foundation day lawmna a buatsaih

30th January, 2025

Governor General VK Singh chuan 'Ek Bharat Shreshtha Bharat' hmalakna hnuaiah nimin khan Raj Bhavan-a Durbar Hall-ah Manipur, Meghalaya leh Tripura state-te pualin foundation day lawmna a buatsaih a; Mizorama awm state pathum mite leh zirlaite an tel.

General VK Singh chuan, Ek Bharat Shreshtha Bharat kaltlanga state dangte dinchampha inlawmsak ṭhinna chuan India ram culture hausakzia leh inpumkhatzia a pholang tih a sawi a, "Prime Minister-in India ram chu kum 2047-ah ram changkang leh intodelh, 'Vikshit Bharat' a hlankai a tum kawngah hmarchhak state-te hian dinhmun pawimawh tak kan luah a ni," a ti a, kalkhawmte chu state dangte hnam ziarang leh nunphungte phur taka hriat chian tum tur leh zah thiam tum turin a chah.

He hun hi ADC (P) to Governor Zonun Thara'n a kaihruai a; Manipur Governor Ajay Kumar Bhalla, Meghalaya Governor CH Vijayashankar leh Tripura Governor Indra Sena Reddy Nallu-te video message thlirho niin, Manipur state aiawh Dr Rebecca Angom, PUC associate professor, Meghalaya aiawh Premika Blah, SBI chief manager leh Tripura aiawh Dr Achinta Badya, MZU asst. professor-te'n thu an sawi bakah, Mizorama awm state pathum zirlai (RIPANS)-te'n hnam lam an entir.

Manipur leh Tripura-te hi kum 1949 khan India-ah betin, kum 1956-ah union territory pek an ni a; Meghalaya hi kum 1969 khan Assam state aṭangin autonomous state an ni. Heng state pathumte hi January 21, 1972 khan North Eastern Region (Re-organisation) Act, 1971 hmangin state puitlingah hlankai an ni a; state pathumte din ni (foundation day) hi January 21 kha nimahse, remchan zawkna avangin nimin khan hman a ni.

Ek Bharat Shreshtha Bharat programme hian India rama state leh UT hrang hranga cheng hnam hrang hrang, hnam ziarang leh nunphung inang lo tak takte inkara inpawhna ṭha zawk siam leh an inkara inhriatthiam tawnna nasa zawk siam a tum a; he programme kaltlang hian India rama state leh UT hrang hrangte foundation day lawmna chu Raj Bhavan-ah hian June, 2023 aṭang khan buatsaih ṭan a ni.