Sports Minister-in DoNER Minister kawm

Sports & Youth Services minister Lalnghinglova Hmar chuan nimin khan Delhi-ah Union Minister for Development of North Eastern Region (DoNER) Jyotiraditya Scindia a kawm a, DoNER Ministry kaltlanga Mizoram leh hmarchhak state danga a sports tihhmasawn theih dan hrang hrang an sawi dun.

Lalnghinglova Hmar chuan India ramin Olympic Games 2036 thlen a tum a, sports talent ṭha awmna Mizoram leh hmarchhak state dangte pawh an phur thar hle tih DoNER Minister a hrilh a, "Olympics 2036-a India aiawh tam zawk chher turin Mizoram leh hmarchhak state dangte’n infrastructure leh infiammi tihhmasawn kawngah sorkar laipui, a bikin Ministry of DoNER puihna kan mamawh," a ti.

DoNER Minister chuan sports discipline hrang hrangah result lian tham nei thei tur project siam uar turin Sports Minister hi a lo chah a, project proposal tam zawk nen New Delhi-a inhmuh leh thuai a duh thu sawiin, Mizoram chu theihtawp chhuaha puih a inhuam tih a lo hrilh a ni.