Sorkarin mipui min hrêk na tial tial hi hriatthiam a har - Lalduhoma, MLA

Lalduhoma hian nimin khan thuchhuah siamin, swab sample endik man chu Mizoram sorkarin state dangte aiin a la tam bik hle tih a sawi a, "Hripui a lên nasat ang zelin sorkar hi a inhawng zau tual tual tura kan beisei laiin, mipui min hrêk nasa tual tual ta hlauh hi hriatthiam har kan ti a ni," a ti.

ZLP Leader chuan, Covid-19 dona kaihhnawiha Mizoram sorkarin sum a hman theih tur cheng vbc. 1,061.03 hmuh a ni tawh tih sawiin, "Kan sorkar hian June 5-15, 2020 chhungin Ways and Means Advance cheng nuai 16,848 a pûk tawh bawk," a ti a; chumi hnuah sum eng emaw zat sorkarin a pûk belh leh tawh a rinawm thu a sawi.

Lalduhoma chuan, Covid-19 dona atana hman theih tur sum tam tak a awm chungin Mizoram sorkarin mipui hrêk zawngin hma a la zui zel tih sawiin, "Tunah chuan quarantine centre-a awm man chawi a ngai ta a, RT-PCR-a sample test-na man pawh chawi a ngai ta zel a ni," a ti a; swab test man chu state dang nena khaikhinin, Mizoramah a tam uchuak bik hle a, mi harsa zawkte'n an inendik ngam loh phah thu a sawi.

Covid-19 dona atana hman theih tur sum hmuh tawh dan leh sorkar hotute chêt dan enin, Mizoram sorkar chu sumah a harsa lêm loa a lan thu sawiin Lalduhoma chuan, "Kan êk-cheh ṭhut mai mai dawn lo, an tih ang khan, development hna pawh an kalpui zel thei niin a lang. Session-a zawhna chhannaah, restricted tender ringawt pawh 105, cheng nuai 68,974 man lai an la pe thei a, a hmutu tur chiang saa tender chhuah thlengin an ti thei reng a ni," a ti.

ZLP leader Lalduhoma sawi danin, sorkar laipuiin hripui dona tur thil tam tak a ruahman a, BOCWW fund aṭangin cheng nuai 2,120 hmuh a ni tawh a, MGNREGS aṭangin nuai 16,788 dawn a ni tawh. PM Kishan Scheme, PM Jan-dhan Yojana, PMGKVY, PM Kalyan Garib Package, PMGRAY leh PM Economic Package aṭangtein chhawmdawlna chi hrang hrang dawn a ni.

Sorkar laipuiin fiscal deficit neih a phalsak chin 3% chu 5%-ah a tisang a, Ways & Means hmanga pûk theih chin pawh 60%-in a tisang a ni. BADP sum nuai 2,794 chu K-Deposit-ah dahṭhat a ni a, SEDP-ah nuai 51,300 dah a nih bakah, CM-in Assembly House-a a sawi angin, damlo apiang hman turin chhungkaw tin tan Rs. 2,00,000 ṭheuh dah a ni bawk.

Covid-19 a darh nasat tawh viau karah VC/LC inthlan neih luih a ni tih sawiin Duhoma chuan, "Nakkum November thlenga pawhsei theih a nih lai leh, kohhran inkhawm pawh phal a la nih loh laiin kan ngenna hnâwl a ni a, tunah a pawi thuizia a lang ṭan ta. Chuti chung chuan, 'Kan CM-in Pathian a ṭih vangin kan him,' 'Kan hotute mit chung lamin a tihvarsak' ti tâwk kan la awm zel a ni," a ti a; zanah arsi a lang ṭhin angin, thimin Mizoram a la bâwm rih niin a sawi.

Lalduhoma chuan, Covid-19 contact tracing leh sample latu te, test titu mihring leh kháwlte an indaih lo a, an rim tak zet thu sawiin, a hmatáwnga duty leh sorkar mi pawimawhte'n hri an kai mek a, indaih lohna a zual zel tih a sawi a, "Veng ṭhenkhatah chuan an hruaitute khung an ngaih avangin rorel a buai ṭan. VIP, hri veite tan a bika enkawlna hmun siam a ni hi thil ṭul lo tak a ni a, hripui karah leh zel VIP culture chhawm nun hi a mawi lo," a ti.

#    Sum hmuhna    Sum zat

        (Rs. in lakh)

1.    North Eastern Council    300.00

2.    NHM Phase-I (Phase II & III dawn tur a la awm)    788.00

3.    NESIDS 1st Instalment (2nd & 3rd nuai 969.75 a la awm)    646.51

4.    PM Care Fund    324.00

5.    SDRF 1st instalment (2nd Inst. nuai 2,350 a la awm)    2350.00

6.    Power Grid Corporation (donation)    14.00

7.    One time special dispensation (loan)    27100.00

8.    Devolution of Taxes, March-Sept, 2020    71100.00

9.    CMRF (August 2020 thleng)    2076.00

10.    District hospital tihchangtlunna    529.69

11.    MLA 35-te fund nuai 25 ṭheuh (Thla hlawh 30% pek tel loin)    875.00

    BELHKHAWM    106103

#    Sorkar laipuiin hripui donaa a hmatáwngte tan insurance cheng nuai 50 a dah a, Mizoramin nuai 20 a dah; civil mi, LTF/VTF duty-te a huap lo.

#    March 2020 thla tìrah India ramah RT-PCR laboratory 52 a awm a, ICMR-in district tinah lab. dah ṭulin a hria a, dan leh hraite pawt fánin, lab. dinna tur sum chenin NHM-in a tumsak. Tunah RT-PCR lab. 884 a awm ta a, 473 chu sorkar ta, 411 chu private a ni. TrueNET lab. 731 leh CBNAAT lab 121 a awm bawk.

#    Mizoram sorkar erawh chuan lab. din a harsatzia ringawt min sermon khum.

#    RT-PCR kan mamawh thu February 2020-a budget session-ah sawi a ni tawh... Ni khata test theih zat a tlem, test tur a pung nasa si, veng tinah test tur khung khawm an ni a, test hmain an inkai darh hman zel. Test man pe theite'n ngaihsak an hlawh a, pe thei lote tan nghah chhung a rei lutuk. Hri vei lai mi 8 chhuah an ni a, rei lo te chhungin mi dang an kai hman. Test-na khawl donate kan tumte kha lo pawm mai se chuan, kan buai lo tur.

#    Ram zím têah mihring tlemtê, Delhi-a motor pawh zat lo kan awm a, hei aia fel zawka enkawl theih âwm tak chu kan ni. Phuahchawp leh 'risk' la chung hi chuan thui kan thleng lo ang.