KHAWTHLIR

Mizoram Board of School Education (MBSE) chuan Mizoram Teacher Eligibility Test (MTET) 2020 dilna form thehluh hun chu September 29, 2020 thleng an pawtsei. MSU chuan thuchhuah siamin, MBSE-in Covid-19 avanga zirlaite harsatna an tawh avanga MTET dilna form thehluh hun sawn tura an ngenna an tihhlawhtlinsak avanga an lawm thu an tarlang.

Lawngtlai DC Dr Andrew H Vanlaldika chuan thupek chhuahin, an district-ah Mizoram Fisheries Act, 2012-in a phal bak hmanraw hmanga luia nungchate dynamite, chinai, túr chi hrang hrang, bleaching powder, rù, dynamo leh generator hmanga luia nungchate man leh nghafuan vên a khap. Thupek hi luia nungchate dan bawhchhia man leh ṭul loa suat a nih ṭhin avangin, nungchate an mang mai lohna tura chhuah a ni.

Kolasib-a Horticultute office bultumin nimin khan an district-a dragon fruit chíngtute tan leiṭha siam dan zirna buatsaih a ni. Kum 2019-20 chhung khan Kolasib district aṭangin dragon fruit quintal 142 thar a ni a, Rs. 28,40,000 man vel a ni. Kum 2020-21 kal mekah quintal 350 vel thar an inbeisei a, an inbeisei zat aia tam an thar tawh a ni.

Champhai District Court thupek bawhzuiin nimin khan dan loa vawk phurh luh 10 chu Champhaia AH & Vety Complex-ah kah hlum a nih hnuah phûm a ni. Nimin vek khan Champhaia AH & Vety department, Police leh Environment, Forest & Climate Change department-te chuan sorkar thupek zâwm loa phurh vawk note pali leh a neitu Chinglunnuami (39) d/o Paukhawlang, Champhai Bethel Veng an man.

State Referral Hospital-ah nimin khan Covid-19 vei mi pathum leh rinhlelh thilah mi pahnih dah luh an ni. SRH-ZMC Bulletin tarlan danin, SRH-ah hian hripui vei vangin mi 73, mipa 35 leh hmeichhia 38, thla 10 leh kum 75 inkar enkawl mek an ni a, Isolation Ward-ah mi 72 leh SICU-ah mi pakhat an awm. harsatna lian tham nei an awm lo.