Mizorama lut tur lirthei dan tintuah

Mizorama lirthei kaihhnawih pawl hrang hrang 10 hruaitute Zoram Drivers' Union (ZDU) pisaa September 21, Thawh­ṭannia ṭhukhawm chuan, Mizo tanklorry driver Lailaipur-a kutthlaktute man an nih loh chuan Mizorama lirthei lut tur dan an rêl.

Pawl hrang hrangte chuan, September 12, 2020-a an driver-puite'n Lailapur-a kut an tuar chu pawi an tih thu tarlangin, "Zangnadawmna pek leh motor siamna senso pek kan ngen. Pawi khawihtute hi a rang thei ang bera man chhuak turin Mizoram sorkar kan beisei. Ni 29.9 2020 hmain a hlawhtlinna kan hmuh loh chuan Mizorama lirthei lo lutte dan a, a hlawhtlin ngei theih nan hmalak ni se," an ti.

Mizorama lut turte swab sample test sorkarin a kalpui chu ṭha an tih thu tarlangin pawl hrang hrangte chuan, "Vairengte checkgate-ah sample test-na pakhat dah belh ni se," a ti a, hnam dang leh Mizo a hrana endik turin thuneitute dil an rêl a ni.

Cachar driver-te'n an duh hun huna kawngpui an dan ṭhinah, Mizoram sorkar hotute'n remna an siampuinaah a kaihhnawih driver-te tel ṭhin se an duh a, "Bairabi, Tripura leh Manipur aṭangin Mizoram mamawh hrang hrang phurh luh dan tur Mizoram sorkarin ngaituah rawh se. Cachar-ah road block an siam leh a nih chuan Mizoram commercial driver leh owner-te'n road block siam ve ni se," an ti.

Ṭhutkhawmah hian Zoram Drivers Union, Mizoram Oil Tanker Driver Association, Mizoram Truck Driver Association, Mizoram Tipper Association, City Bus Driver & Conductor Association, Mizoram Maxicab Owner Association, 407 truck pawl, Mizoram Taxi Association leh Mizoram Gas Driver Association-te an tel a ni.