Dona leh beihna nasa tak karah ZPM-in hma a sawn zel - Duhoma

Nimin khan Tachhipah ZPM VC thar lawmna leh mi thar lawm luh inkhawm buatsaih a ni a; an hun hmanpuitu Lalduhoma, ZPM Legislature Party (ZLP) leader chuan, dona leh beihna nasa tak karah ZPM-in hma a sawn zel tih a sawi.

Lalduhoma chuan, sum a tam leh tlem aiin, hman dik leh dik loh a pawimawh zawk tih sawiin, "Eng ang pawhin tam se, kan hman dik si loh chuan kan chhiatpui ting mai a ni. Kan budget hi a nih dan tur angin hmang ila, he ram siamṭhatna tham a ni. Kan sorkar hunah chuan sum kalkawng kan her danglam ang a, mipui hnen a thleng tawh dawn a ni," a ti.

ZLP Leader chuan, ZPM MLA-te chu an fund hman danah mipui mak tih a hlawh nia sawiin, "MNF MLA 27-te fund hman dan ai chuan, ZPM MLA pasarihte fund hman dan a lâr zawk. MLA pasarih lekin ZPM policy 'Kalphung thar, mipui sorkar' ziaráng kan lantir ang hian, ZPM VC leh LC-te pawhin an lantir ve tur a ni," a ti a; Tachhip chu Mizorama rorelna khawl thar piang tur hmahruai ni turin a chah.

Tachhip VC thlan tharte fuihna thu sawiin Lalduhoma chuan, "Tachhip khawtlang rorelnaah, kalphung thar, mipui sorkar thlentir thei tur VC thar ZPM in a nei hi a lawmawm hle. Rinawm taka he ram leh hnam siamṭhat hna thawktu, mi ṭangkai ni zel turin ka ngen che u," a ti. ZPM thuchhuah tarlan danin, Lalduhoma hian ZPM-ah mi 112 a lawm lut a ni.