State dangin a thlâwnin an test thei - MPYCC President
Mizoram Pradesh Youth Congress Committee (MPYCC) president Dr Lalmalsawma Nghaka chuan, state dangah chuan swab sample test a thlâwna an tih theih thu sawiin, "A thlàwna ti lote pawhin mipui tam zawkin an test theihna atan test man an titlâwm," a ti.
Dr Lalmalsawma hian nimin khan a chenna inah thuthar thehdarhtute a kâwm a; India ram state dangah chuan Covid-19 test a thlàwna an tih theih thu sawiin, "Meghalaya-ah chuan Covid-19 hluarna Shillong-ah a thlàwnin sample an test ṭhin. A thlâwnin an test mai ni loin, mipui a duh apiangin an test theihna atan khawlaiah thawktute kal kualin, a duh chu an test ṭhin," a ti a; Mizoram sorkar chu test man an thlàwna an ti theih lo a nih pawhin, titlâwm tal tura an phût thu a sawi.
Health department thuchhuakah, swab sample endik tawh aṭanga 1% vel chiahin a man an chawi thu tarlan a ni tih sawiin MPYCC President chuan, "Hei hian mipui vantlang in test duhte pawh a test man a to avangin an test loh phah tih a tichiang hle. A pawi a, a vanduaithlak tak zet. ICMR-in kan ramah test kit-te siam a nih tawh avangin May 25, 2020 daih tawh khan RT-PCR test mana Rs. 4,500 lâk ṭhin chu ennawn a, a tláwm thei ang bera rate thar siam turin a hriattir a, Mizoramah chuan Rs. 4,500 char char kan hmang a ni," a ti.
Dr Lalmalsawma chuan, tu pawh inrinhlelhna neite chu an inendiktir zung zung a pawimawh thu sawiin, "Mizoram sorkar hian Covid-19 dona atan sum a séng tlém hle a, a sèn ber pawh Chief Ministers' Relief Fund leh sorkar laipui aṭanga Covid-19 dona atana sum a dawnte a ni," a ti a, Mizoram sorkarin swab test man a titláwm duh lo chu mak an tih thu a sawi.
MPYCC President chuan, swab sample lâk leh result chhuahah VIP culture a lang chhuak tih sawiin, "Covid-19 enkawlna CCC, VIP tana an siamte kha chu security thilahte kan hrethiam thei. Mahse, sample lâk leh result tih chhuahah kher hi chuan VIP culture hi lang tawh lo se kan duh. VIP chhung leh khatte duhsak bik an ni a, hei hian mipui tam takte sample lak hun leh sample test result chhuah hun a tikhawtlai phah a ni. Covid-19 hian VIP leh VIP lo a thliar si lo," a ti.