MP Vena thusawiah MPCC an lâwm
Mizoram Pradesh Congress Committee (MPCC) chuan thuchhuah siamin, Rajya Sabha MP K Vanlalvena'n Parliament session-ah ramhmul damdawi zir chianna tur research institute Mizoramah din tura sorkar laipui leh a changtu minister a ngen chu lawmawm an tih thu an tarlang a; a hlawhtlin ngei theih nan bawhzui zel turin MP chu an ngen nghal.
MPCC chuan, MP K Vanlalvena'n September 16, 2020 khan Parliament session-ah thu sawiin, "Congress party chuan hei hi lawmawm kan ti a, hlawhtling ngei se kan duh. Mizorama research institute dinna tura hmalakna hi a hlawhtlin ngei theih nana theihtawp chhuah zui zel turin MP hi kan ngen a ni," an ti.
Congress party chuan, December 18, 2017-ah khatih laia chief minister Lal Thanhawla'n minister of state for AYUSH Shripad Naik hnenah DO letter thawnin, Mizorama medicinal plant zir chianna tur research institute din turin a ngen tawh tih sawiin, "Mizoram chu 88.93% forest a la nih thu te, India rama mau lama sumdawnnaa 14% zet thawhtu a nih thu te, medicinal plant leh herbs lama a hausakzia a lo tarlang tawh," an ti a; December 18, 2017-ah vêk Central Council of Research in Homoepathy Director General hnenah DO letter a thawn tih an sawi bawk.
MPCC tarlan danin, Lal Thanhawla DO letter chu January 23, 2018-ah Central Council of Research in Homoepathy director general Dr RK Manchanda-a'n a rawn chháng a; CCRH-in a rang thei ang bera Mizorama regional research institute din an duh thu leh, ram ruak acre 3-a zau ngaihtuah tura ngenna CM Lal Thanhawla a rawn thawn a ni.
Lehkha chu CM Lal Thanhawla'n chháng lehin, Aizawl khawpui chhehvelah ram ruak a vàn avang leh, Thenzawlah AYUSH Hospital ram ruak zau tak a awm sa behchhana research institute din a remchan thu a hriattir a; chu lehkha chu CCRH lam chuan a la rawn chhang leh ta lo thung.