Covid-19: Mizoram dinhmun Hripui vei 26 hmuh belh a ni

September 16, Nilaini khan Mizoramah swab sample 1,266 endik aṭangin Covid-19 vei mi 26 hmuh chhuah a ni a, symptom nei an awm lo. Mi 26 zinga 20 chu Mizoram chhunga kái chhâwng (local positive contact) an ni. Mizorama hripui vei hmuh chhuah tawh zat chu mi 1,506 an ni a; nimin khan dam tawh mi 10 chhuahtir an ni thung.

Covid-19 vei Nilainia hmuh chhuahte chu - ZMC laboratory-a RT-PCR hmanga hmuh mi 13; TrueNAT-PCR hmanga Lunglei Civil Hospital, Serchhip District Hospital leh Hnahthial Hospital-a hmuh chhuah pakhat ṭheuh leh, Rapid Antigen Test (RAT) hmanga hmuh chhuah Aizawl district-ah mi pariat leh Serchhip district-ah pahnih an ni.

Nimin khan Covid-19 vei zinga dam tawh mi 10 chhuahtir an ni a; State Referral Hospital aṭangin mi pasarih leh Thingdawl CCC aṭangin mi pathum an chhuak. Nilainia chhuahtir zingah nimina Vanglainia tarlan hman loh Thingdawl CCC aṭanga chhuahtir mi 10 an awm.

Mizorama Covid-19 vei hmuh chhuah tawh mi 1,506-te chu mipa 1,232 leh hmeichhia 274 an ni a; an zinga mi 949 (63.01%) chu chhuahtir an ni tawh a, mi 557 (36.99%) an la chhuak lo. La chhuak lo zingah hripui vei tawh lo, negative tawh an awm nual bawk.

September 16 khan ZMC laboratory-ah RT-PCR hmangin mi 796-te swab sample endik a ni a, chu'ng zinga mi 13 chuan hripui an vei tih finfiah niin, mipa panga leh hmeichhia pariat, kum 25-55 inkar an ni. An vaiin local positive contact vek an ni a, an zingah kài ṭanna ber hriat loh pahnih, National Health Mission (NHM) hnuaia thawk pahnih an tel.

Lunglei Civil Hospital laboratory-ah TrueNAT-PCR hmanga mi 37 endik zingah Covid-19 positive pakhat - BSF sipai, tun hnaia Jammu & Kashmir aṭanga rawn lut hmuh chhuah a ni. Serchhip District Hospital-a mi 30 endik zingah West Bengal lam mi mipa pakhat, NH-54 siamtu Kram Infracon-a thawk hmuh chhuah a ni a; Hnahthial Hospital-ah Jharkhand aṭanga rawn lut mipa kum 40 mi hmuh a ni bawk. TrueNAT-PCT hmanga hmuh chhuahte hi quarantine facility-a awm lai, symptom nei lo vek an ni.

Nilaini vêk khan RAT hmangin Aizawl district-ah Covid-19 vei mi pariat - mipa leh hmeichhia pali ve ve hmuh chhuah a ni a, naupang kum 5 mi leh putar kum 83 mi an tel. An zinga pasarih chu Mizoram chhunga kái chhâwng an ni a, pakhat chu state páwn aṭanga rawn haw a ni thung.

RAT hmang vêkin Serchhipah mipa pahnih, BSF sipai ve ve hmuh chhuah a ni a, Bihar leh Rajasthan aṭanga rawn lut, quarantine facility-a awm lai ve ve an ni.

September 16 khan district parukah TrueNAT-PCR hmangin mi 125-te swab sample endik a ni a, RAT hmanga endik zat chu district district pasarihah 345 a ni.