Kan district-a hripui vei hmuh chhuahte khung hran vek an la ni - Lawngtlai DC

Lawngtlai bawrhsap Dr Andrew H Vanlaldika chuan September 21, Thawhṭanni tlai khan a pisaah thuthar thehdarhtute a kâwm a; an district-a Covid-19 vei hmuh chhuahte chu khung hran lai an la nih vek thu a sawi.

Dr Andrew H Vanlal­dika chuan, Septem­ber 19 & 20 khan Lawngtlai District Hospital-a TrueNat laboratory aṭangin Lawngtlaia 71 BRO mi leh sa khung hran mek zingah Covid-19 vei mi paruk hmuh chhuah an nih thu a sawi a, "Heng mite hi anmahniah hri vei lan chhuahna (symptom) a awm lo a, hriat chhuah a nih veleh quarantine centre aṭangin CCC-ah sawn an ni," a ti.

Lawngtlai district-a hripui kai hmuh chhuahte chu khung hran lai vek an la nih avangin mipui tan chîâina tur a awm loh thu sawiin Bawrhsap chuan, hri laka an him theih nana sorkarin tih tur a tih leh inkaihhruaina a zamte ṭha taka zâwm turin mipui a chah.

DC leh thuthar thehdarhtute inkawm­naah hian Covid-19 laka himna tura fimkhurna dan hrang hrangte chu mipuiin hre thawkhat tawh mah se, uar zawk leh zau zawka inzirtir chhunzawm zel a ṭul thu tarlan a ni.

Lawngtlai district-ah Covid-19 vei mi 40 hmuh chhuah a ni tawh a, mi 30 chu dam takin an chhuak tawh. Enkawl lai mi 10 zinga pakhat chu ZMC-ah enkawl a ni a, mi pakua chu Lawngtlai CCC-ah enkawl an ni thung.