KHAWTHLIR

Dodalna thehlut

Mizoram Electricity Regulatory Commission (MZERC) hnenah Power & Electricity department-in Mizoram mipuiten kum 2025-26 chhunga kawlphetha hman man (electric bill) atana rawtna an thlenah sawi duh neite tan hun hawn a nih angin CYMA president hlui Vanlalruata chuan nimin khan Mizoram mipui tawrhna nasa a thlen loh nan kawlphetha hman chhutna aggregate revenue requirement hleihluak lai ṭhenkhat dodalna MZERC-ah a thehlut.

Hmalak khap

Champhai district bawrhsap VL Remliana chuan thuchhuah siamin, Vangchhia khuaa pipute sulhnu - lungphun leh pûk te chu Ministry of Culture, National Monuments Authority-in a humhalh avangin Vangchhia - Kawtchhuah Ropui huamchhungah National Monuments Authority remtihna leh phalna nei loa in sak leh hmalakna dang neih khap a nih thu a tarlang.

NMBA training

Kolasib district bawrhsap Robert C Lalhmangaiha hoin nimin khan Ministry of Social Justice & Empowerment kaltlanga India rama ruihhlo umbona kawnga hmalakna - Nasha Mukt Bharat Abhiyan (NMBA) hnuaia master volunteer leh nodal teacher-te tan training buatsaih a ni a; sorkar hotute bakah, St. John High School, Hmar Veng High School, Vengthar High School leh CZS High School naupangte leh sawmbik mi pawimawhte an tel.

Kawng khar dawn

Republic Playground chung aṭanga Venghnuai Playground (Kela road) inkar kawng siamṭhat hna thawh a nih dawn avangin vawiin leh naktuk hian chawhma dar 10 aṭanga tlai dar 4 thleng helai kawng hi khar a ni dawn.

Road Safety Month

Serchhip leh Mamit District Road Safety Committee chu nimin khan District Bawrhsapte kaihhruaiin an ṭhukhawm a, Road Safety Month (February) chhunga hmalak dan tur an sawiho. Kumin Road Safety Month hi February 4, 2025 khian hawn a ni dawn a, February thla chhung hian awareness campaing, signboad tar, TV talk show leh no tolerance drive-te neih turin an rel.

CM leh IIFCL hotute inkawm

Chief minister Lalduhoma chuan nimin khan a pisaah IIFCL Projects Ltd. CEO Palash Srivastava leh a thawhpuite a kawm a, Mizoram hmasawnna tura thawhhona chungchang an sawiho. IIFCL Projects Limited hian Chawnpui Venga PM Ekta Mall sakna atan hna an kalpui chho mek a ni.