Mizoramah phar enkawl mek 10 an awm

Nimin kha 'World Leprosy Day' a ni a, kumin thupui chu 'Unite, Act. Eliminate' tih a ni. Mizoramah chuan Taxation auditorium-ah National Health Mission mission director Dr Eric Zomawia hoa hman niin, Mizoramah phâr (leprosy) natna vei mi 10 enkawl mek an awm thu tarlan a ni.

He huna tarlan danin, Mizoramah phar natna vei mi 1,500 chuang chinchhiah tawh niin, tun dinhmunah phar natna vei enkawl mek hi Aizawl district-ah mi pali, Lunglei district-ah mi pahnih, Lawngtlai district-ah mi pathum leh Kolasib district-ah mi pakhat an awm.

Dr Eric Zomawia chuan, phar natna hi India ram pumah kum 2027 khian umbo tuma hmalak mek a nih thu leh hemi atana thawktu NHM hnuaia National Leprosy Eradication Programme-ten theihtawp an chhuah thu a sawi a, "Tun hmain India ramah phar natna veite'n endawng an hlawh nasa a, Mizoram ngeiah pawh pharte tan a inthlahrunawm ṭhin hle. Phar natna enkawlna damdawi MDT hi man to tak ni mahse, sorkarin a thlawnin a pe ṭhin a ni," a ti.

State leprosy officer Dr Lalawmpuia Chhangte chuan phar natna chu hlauhawm leh ṭihbaiawm a nih loh thu sawiin, phar natna veia inringhlelte chu damdawi-in hrang hranga skin specialist-te emaw, Civil Hospital Aizawla Department of Dermatology-ah emaw inentir ṭhin turin a ngen.

He hunah hian The Leprosy Mission, Mizoram executive secretary Rev. TC Zodinsanga leh Dr Lalnunpari Sailo (Civil Hospital Aizawl medical officer i/c Urban Leprosy Centre)-te pawhin thu an sawi a; Health department hotu te, Mizoram College of Nursing final year zirlai te leh Health Worker Training Institute, Kulikawna final year zirlaite an tel a ni.