Lunglei leh Hnahthial district-ah rulhut hlo pek tur 51,601 an awm

Lunglei District Level Co-ordination Committee for National Deworming Day chuan January 29, Nilaini khan an chairman Naveent Mann, district bawrhsap hoin DC conference hall-ah National Deworming Day (NDD) February Round 2025 kalpui dan tur an sawiho a; kumin NDD February round-ah hian Lunglei leh Hnahthial district-ah rulhut hlo pek tur (target) kum 1 leh kum 19 inkar 51,601 an awm thu tarlan a ni.

National Deworming Day hi kum tin vawi hnih (February leh August thlaah) hman ṭhin a ni a, kumin NDD February round hi February 10 aṭanga hman ṭan tura ruahman niin, naupang kum 1-19 inkarte rulhut hlo (Albendazole) eitir vek tura tih a ni.

Naupang kum 2 hnuai lamte chu rulhut hlo mûm chanvea eitir ṭhin niin, kum 2 chunglamte chu mûm khat pek ṭhin a ni a; rulhut hlo hi zirna-in leh anganwadi centre-ahte pêk leh tura ruahman niin, chumia hmaihte chu an ina kalchilha pek leh tur a ni.

NDD 2025 February round bulṭanna leh hawnna hun hi February 10, 2025 chawhnu dar 1-ah Lunglei Rahsiveng High School-ah neih a ni dawn a, hemi ni hian Lunglei leh Hnahthial district-a sikul, college leh anganwadi centre-ahte kum 1-19 inkarte hi rulhut hlo pek a nih dawn bakah, sikul kal lote chu ASHA-te'n an inah kal chilhin an pe dawn a, target zinga tel si, hemi nia pek hman lohte tan mop up day buatsaih a ni leh dawn.

NDD August 2024 round-ah khan Lunglei leh Hnahthial district-a target mi 60,532 zinga 97.06% chu rulhut hlo pek an ni a; kumin NDD February round-a rulhut hlo pek tur atan hian Lunglei leh Hnahthial district-ah kum 1 leh kum 19 inkar target 51,601 an awm a ni.