MSPMC-in hmasawnna hnathawh hrang hrang an enfiah

Mizoram State Project Monitoring Commitee (MSPMC) chuan an vice chairman R Lalrinawma kaihhruaiin January 29, Nilaini leh nimin khan Thingkah Polytechnic building, Lawngtlai Mampuia District Sports Complex, Siaha DC office building leh bangla, Polytechnic leh Nursing School building, EMRS School Noaotla, Siaha-Lobo-Tluangram (Hakha/ Myanmar) leh Noaotla - Chakhei inkar kawng siam hna thawh mekte an tlawh a; an thil endik leh zirchianna report hi Chief Minister hoin an thlirho leh dawn a ni.

MSPMC team-te hian January 29, Nilaini khan Thingkah Polytechnic building - academic block, hostel leh staff quarters-te hi PWD kaltlangin cheng nuai 800 sengin kum 2013-ah sak ṭan a ni a, kum 2014 khan sak zawh ni mah se, sak zawh a nih aṭanga hman a nih loh avangin a hlui chhe tawh hle.

MSPMC team-te hian Thingkah Polytechnic building chu luahlum loha dah reng loa, ṭangkai zawka hman theih dan tur an zirchiang a ni.

Nilaini vek khan Lawngtlai District Sports Complex, Mampui-a hnathawh kal mek an enfiahnaah MSPMC team-te hian hnathawh tawh chin a ṭhat leh ṭhat loh bakah, hun tiam chhunga zawhfel a ni thei dawn em tih an endik a; cheng nuai 5019.43 seng a sak tur sports complex hi Decor India, Guwahati-te'n July 25, 2022 aṭang khan sak hna an thawk a, July 24, 2025-ah zawhfel tura ruahman a ni.

MSPMC team-te hian nimin khan Siaha DC office building leh bangla, Polytechnic building (administrative building, hostel leh staff quarter) leh Nursing School-te, EMRS School Noaotla, Siaha-Lobo-Tluangram (Hakha/ Myanmar) te, Noaotla - Chakhei inkar kawng PMGSY hnuaia siam mekte an enfiah.

Siaha DC office building hi NEDP aṭanga PWD sak a ni a, DPR/estimated cost/approved cost chu cheng nuai 610.11 a ni. October 31, 2018 khan sak ṭan niin, kum hnih chhunga zo hman tura ruahman a ni a, hna 90% zawhfel tawh a ni. DC Bangla (type-VI) hi NEDP aṭanga PWD sak a ni a, DPR/estimated/ approved amount chu nuai 110.90 a ni a, November 26, 2018 khan sak ṭan niin 98.3% zawh tawh a ni.

Thosai-a Polytechnic Administrative cum Academic Block hi CSS aṭanga PWD thawh (execute) a ni a, April 11, 2016 khan sak ṭan niin, DPR/estimated/approved cost chu nuai 800 a ni. GNM School Building hi CSS aṭanga Health & Family Welfare department sak a ni a, DPR /estimated/approved amount chu nuai 377.10 niin, January 2013 khan sak ṭan a ni bawk.

MSPMC team-te hian he'ng building satu contractor-te chu building la sak zawh lohte a huna sak zawh an nih loh chhan leh harsatnate an zawt a; ṭangkai zawka hman theih dan tur an zirchiang nghal bawk a ni.