State Day of Prayer pualin Committee an din

Saitual leh Khawzawlah nimin khan District Bawrhsapte kaihhruaiin sorkar hotu te, kohhran leh tlawmngai pawl hruaituten an district-a Mizoram State Day vawi 39-na puala State Day of Prayer hman dan tur an rêl a, State Day of Prayer puala hmalatu tur committee an din.

Saitualah chuan district bawrhsap Dr Lalngura Tlau hoin DC conference hall-ah Saitual district-a State Day of Prayer hman dan tur rel a ni a, State Day of Prayer Committee general secretary Dr PC Biaksaiama'n a telpui.

Ṭhukhawm chuan State Day of Prayer pual bika Saitual district-a hma la turin District State Day of Prayer Committee an din a; chairman atan Rev. Thangchhuaka, vice chairman-ah Capt. HS Lalramkinlova, secretary-ah Rev. Lalremruata, treasurer-ah MHIP president Lalbiaktluangi leh adviser atan DC leh SP-te an ruat a ni.

Khawzawlah chuan DC Meeting Hall-ah bawrhsap K Vanlalṭhiana hoin an ṭhukhawm a; State Day of Prayer Committee vice chairman Dr R Vanlalzauva'n telpuiin, Khawzawla State Day of Prayer hman dan tur buaipui tur leh buatsaih turin Organizing Committee an din a, chairman, secretary leh member turte an inruat nghal bawk.