ZMCH Anti-Ragging Committee an ṭhu

Zoram Medical College & Hospital (ZMCH) Anti Ragging Committee chu January 29, Nilaini khan an ṭhukhawm a, ZMCH hostel-ah zirlaite intihduhdahna (ragging) a awm lohna tura hmalak dan leh hma thar lak dan turte an sawiho.

Ṭhutkhawm hi ZMC director Dr John Zohmingthanga'n a kaihruai a; ZMC hotu te, MZU aiawh, zirlai aiawh, zirlai nu leh pa aiawh, media aiawh, Falkawn VC leh YMA aiawhte an tel. Dr John Zohmingthanga chuan, ZMCH chu free ragging college-ah an inchhal laiin, nikum 2024 khan ragging tâwk nia insawia complaint pakhat a awm avangin an bawhzui a, thil lian tham a nih loh thu leh an chinfel thu a sawi.

ZMCH zirlaite zingah ragging a awm lohna tura hmalakna hrang hrang sawi lan a ni a, hma thar lakna turte pawh sawi niin, an rorel zingah hostel-ah CCTV dah tura hmalak leh complaint box dahna hmun enfiahte a tel.

ZMCH-ah hian under graduate zirlai 495 an awm a, chu'ngte chu Mizoram state quota-a lut mi 358, all India quota-a lut 63 leh non-residential Indians quota 74 an ni. Anni bakah hian internship ti mek, April 2025-a zo tur 95 leh MPH zirlai paruk an awm bawk.

Thawktu mi 629 an awm a, chu'ng zingah chuan professor 10, associate professor 23, assistant professor 39, senior resident 15, demonstrator/tutor 25 tel.