Hripui vei hmuh thar mi 26 zingah Mizorama kái chhâwng 20 an awm
September 16, Nilainia Covid-19 vei hmuh thar mi 26 zingah Mizoram chhunga kai chhâwng (local positive contact) 20 an awm a, an zingah kum 83-a upa telin, Mizorama hripui vei tawh zinga upa ber nia hriat a ni.
Sorkar thuchhuah tarlan danin, hripui vei hmuh thar zinga Mizorama kai chhâwng mi 20-te chu ZMC laboratory-a hmuh chhuah mi 13-te leh Rapid Antigen Test hmanga hmuh chhuah pasarih an ni a; a naupang ber chu kum 5 mi a nih laiin, a upa ber chu kum 83 mi a ni thung.
Covid-19 positive hmuh thar zingah hian National Health Mission (NHM) hnuaia thawk mi pahnih - Ramhlun Venglaia mipa kum 30 mi leh Upper Republic-a hmeichhia kum 31 mi an tel a; an pahnih hian National Ambulance Service (NAS)-a awm, NHM pisa pui ber, Health Services directorate-a thawk an nih thu, NHM Contract Association of Mizoram hruaitute chuan an sawi. Hripui an kai chhan sawi tur an hre lo ve ve.
Chhinga Vengah Covid-19 positive hmuh chhuah thar nupa tuak khat an awm a, a mipa hi kum 47 niin a hmeichhia hi kum 43 a ni. Chhinga Veng mite sawi danin, a mipa hi School Education department-a thawk, local council inthlan atana training-a tel ve leh vote chhiartute zinga mi a ni a; contact tracing vanga sample test ni loin, anmahni thua inendiktir an ni.
September 16-a Covid-19 vei hmuh thar zingah Armed Venga mi panga an awm a, mipa pakhat leh hmeichhia pali an ni a, an vaiin 1st MAP hmuna MI Room (damdawi-in tênau)-a thawk, hripui vei hmuh chhuah tawh hnu chhuina kal zela endik niin, hmeichhia zawng hi 1st MAP mi leh sa an ni. Armed veng South-a Covid-19 vei hmuh thar pahnih zinga pakhat, mipa hnam dang pakhat pawh 1st. MAP MI Room-a thawk a ni bawk.
Bawngkawn vengah chhungkaw pakhat aṭangin hripui vei mi pali hmuh chhuah thar a ni a, an zingah kum 83 mi leh naupang kum 7 leh kum 10 mi an tel a, mi pahnihin harsatna (Covid-19 symptom) an nei. Mipa kum 83 mi hi Mizorama hripui vei hmuh tawh zinga upa ber nia hriat a ni.
Bawngkawn LTF chuan nimin khan hriattirna tichhuakin, "Pu F Lalzapa te chhungkua aṭangin mi pali Covid-19 positive symptom nei an awm avangin Khuangchera Section, Lunglei Road Pu Monia workshop aṭanga Ṭhuampui ramri thleng Red Zone-ah puan a ni a. Hemi huam chhunga mite tu mah páwn chhuah loh tur a ni a, tu mah he lai hmunah hian veng mipuite châwl khawmuang lo turin kan inhriattir e," an ti.
Bawngkawn South-ah pawh chhungkaw pakhat aṭangin Covid-19 vei mi pathum hmuh chhuah a ni a, an pa berin symptom a nei a, a khua a sik avangin hmanhmawh thilah RAT hmanga endik an nih thu, an veng LTF hruaitute chuan Vanglaini an hrilh.
Mizoram chhunga hripui kái chhâwng hmuh tharte chungchangah hian Vanglaini chuan an awmna venga LTF leh YMA hruaitute a be kual a ni.
Local positive contact-te dinhmun (Sept. 16)
Khua/Veng +ve zat Kai chhan leh dinhmun
Armed Veng 5 Mipa 1 & hmeichhia 4 (kum 38-55),
1st MAP MI Room aṭanga kai
Mipa kum 45 & hmeichhia kum 26;
Armed Veng South 2 Mipa zawk 1st MAP MI Room-a thawk;
Hmeichhia zawkte inah positive a léng
Bawngkawn 4 Chhungkaw pakhata mi mipa 2 (kum 7&83),
hmeichhia 2 (kum 10&36); 2-in symptom an nei
Nupa (kum 40&38) leh an fa kum 5 mi;
Bawngkawn South 3 Pa ber UDPA JE, Sept. 9-ah Durtlangah
LC-te nen thil an ti ho; pa berin symptom a nei
Nupa; mipa kum 47 & hmeichhia kum 43,
Chhinga Veng 2 Mipa zawk School Education-a thawk,
LC inthlan vote chhiarnaa tel
Falkland Veng 1 Mipa kum 25, Zemabawka +ve kaihhnawih
Ramhlun Venglai 1 Mipa kum 30, NHM hnuaia thawk,
kai chhan hriat chian loh
Upper Republic 1 Hmeichhia kum 31; NHM hnuaia thawk,
kai chhan hriat chian loh
Venghlui 1 Hmeichhia kum 54, High Court-a thawk,
An thawhpui aṭanga kai, Pet Division kal zel