Poshan Maah pualin hun hmang

Krishi Vigyan Kendra, Mamit district, Lengpui chuan nimin khan Lengpui community hall-ah Rashtriya Poshan Maah (National Nutrition Month) hawnna inkhawm an buatsaih a, senior scientist Dr Vanlalhruaia Hnamte-in kaihruaiin, bialtu MLA Lalrintluanga Sailo-in a hmanpui.

Lengpui, Lengte, Nghalchàwm, Hmunpui leh West Serzawl aṭangin Anganwadi worker leh helper-te leh MHIP lama farm women-te an tel a; Dr Rebecca Lalmuanpuii, Dr Rohit Shukla leh Biakhlupuii Chenkual ten ei tur ṭha pawimawhna leh thlai chîn dan an zirtir. KVK, Lengpui enkawl hmunhmate fanpui an ni bawk.

KVK, Serchhip district, North Vanlaiphai pawhin nimin khan N Vanlaiphai Bangla veng Presbyterian Kohhran hall-ah Rashtriya Poshan Maah an hmang a, East Lungdar RD Block chhunga anganwadi worker leh helper-te leh MHIP aṭangin farm women-te an tel.

He hunah hian N Vanlaiphai SDO (C) Dorothy Muansangi'n thu sawiin, chuktuah huan neih kawngah hmalak a ṭul thu leh a ṭangkainate a sawi a; chuktuah huan siam chu Poshan Abhyian-in a tum a nih angin, an anganwadi centre enkawl ṭheuhah chuktuah huan neih tum vek turin anganwadi worker-te a chah.

Siahaah pawh KVK, Siaha district buatsaihin MADC Forest Hall-ah Poshan Maah pualin hun hman a ni a, KVK, Siaha senior scientist Dr H.Vanlalhmuliana'n kaihruaiin, bawrhsap Kesavan R-in a hmanpui.

Bawrhsap chuan, naupangte chu an pian hlim aṭangin chaw ṭha an mamawh thu leh nu hnute tuia chawm ṭhat a pawimawh ber thu a sawi a, "Nuasénte chu an ṭhan chho zelnaah pawh chaw ṭha leh hrisel pek uar a ngai a, chu chuan puitling an nih thlengin rilru leh taksa a pui dawn a ni," a ti.

Inkhawmah hian naupangte chawṭha pek pawimawhna leh chawṭha neih dan te, anganwadi-a chuktuah huan siam dan tute inzirtir a ni a; thlai chi sem a ni bawk.