VIP tan bika CCC siam sût a ni ZMC atangin New MLA Hostel-ah Dr BD Chakma an sawn

Health depatment chuan September 15, 2020 khan very important person (VIP)-te tan bik Covid care Centre (CCC) siamna thupek (notification) a tichhuak a, a tûk, September 16-ah notification dang tichhuak lehin, VIP tan bika siam a nihna chu paih a ni.

Sorkar notification hmasaa lang VIP tan bika CCC siam chu Khatlaa New MLA Hostel a ni a, mi 28 awm theihna a ni. Hetih lai hian, MLA Dr BD Chakma chu nimin khan ZMC, Falkawn aṭangin New MLA Hostel, Khatlaah hian sawn a ni.

 Dr BD Chakma hian nimin khan Health Minister leh MLA Dr ZR Thiamsanga hnenah thu thawnin, a awmna ward-ah September 16 khan Health department-a deputy secretary hmeichhia, Covid-19 symptom nei dah luh a nih avangin awm dun a ṭha dawn lo a, Legislator's Home-a home isolation phalsak turin a ngen a; a chhungte pawh isolation room lo buatsaih tura a hrilh tawh thu a tarlang.

Vanglaini palai zawhna chhángin Dr BD Chakma chuan, home isolation a dil chhan chu VIP leh VIP loh lam a ni lo tih a sawi a, "Health dept. DS khan symptom a nei a, keiin ka nei si lo. Pindan pakhata kan pahnih chauh, mipa leh hmeichhia dah dun kha a fuh lo em em bawk. SRH-a min enkawltu doctor, nurse leh mi dangte chungah ka lawm em em a, sorkar thil tih dan erawh a fuh lo a, a lungawithlak loh," a ti. RAT hmanga re-test ah a negative tih hmuh a nih thu a sawi bawk.