Kum 50+ zingah thisen pe an tam lo

Aizawl Civil Hospital (ACH) Blood Bank-ah kumin January aṭanga August thla thlenga thisen petu zingah kum 50 chung lam thisen pe an tlém hle. Hrisel pangngai tan kum 65 thlengin thisen pek theih a nih avangin, kum 50 chuang tawhte pawh thisen pek uar turin blood bank-a thawktute chuan an ngen.

Vanglaini palaiin a kawmnaah ACH Blood Bank-a head of department (HoD) Dr K Rothangpuia chuan, Covid-19 léng vanga inkhàrkhip chhungin thisen pek a tam tâwk lo a, kumin January aṭanga August thla chhung khan thisen an dawn zawng zawng chu unit 9,181 a nih thu a sawi.

Dr K Rothangpuia chuan, January-August, 2020 chhunga an hnena thisen pe mi 9,181 zingah kum 50 chung lam mi 79 (mipa 78 leh hmeichhia pakhat) chiah an awm thu sawiin, "Thisen hi kum 65 kan nih thlengin a pek theih a, hnam dang zingah pawh kum upa lama pe an awm fo a ni. Mizo zingah thisen pek hi ṭhalaite kutah kan dah nasa deuh niin a lang a, kohhran hrang hranga pavalai pawlte leh kum 65 la tling lo, hrisel ṭha bawk site'n pe zel thei se kan dinhmun a ṭha lehzual ang," a ti.

Aizawl Civil Hospital Blood Bank hotute sawi danin, Mizo ṭhalai zingah páwl leh kohhran ṭhalai hming ni lo, mimala thisen pe an pung zel a, blood bank hotute'n an chhinchhiah dan chuan, mimala thisen pe hi kum 2017-18 (financial year)-ah mi 6,279 an ni a, kum 2018-19-ah mi 8,073 leh kum 2019-20-ah hian mi 7,433 an ni.

Association for Voluntary Blood Donation (AVBD) hruaitute chuan, Valentine's Day puala blood donation camp an buatsaih ?hin chuan kum khat chhunga Mizorama thisen pek a tisang hlea an hriat thu an sawi a; chutih rualin, Mizo zingah infiammi, taksa chak ?ha tam tak an awm laiin, infiammite zingah hunbi neia thisen pe an la tam tâwk lo a, ?an lâk a la ngai niin an sawi bawk.

Mizoram State AIDS Control Society (MSACS) hotute pawhin, Covid-19 léng karah ?an lâk a ?ul thu sawiin, State Blood Transfusion Council, MSACS leh AVBD-te hmalakna azarah kumin April-June chhunga Mizorama thisen pek zawng zawng zinga 90% chu mi tlawmngaite’n a thlâwna an pek (voluntary donation) a nih thu an sawi.

MSACS hotute chuan, Covid-19 vangin blood donation camp buatsaih a harsat thu te, blood bank-ah thisen khâwl (stock) a tam tâwk loh thu te, damlo (cancer, nau neih vanga thisen tlachham, internal bleeding, accident leh a dangte)-te'n thisen an mamawhna a sàn dan ngaia a la sàn reng tho si thute an sawi a; Covid-19 léng karah pawh mahnia blood bank-a thisen pek kawngah ṭhahnemngai taka ṭan la lehzual turin mipui an ngen a ni.