KHAWTHLIR

Silai khap

Lunglei leh Hnahthial District Magistrate-te chuan thuchhuah siamin, February 12, 2025-a VC/LC inthlanpui neih turah inthlanna muanawm leh felfai a awm theih nan inthlan zawhfel a nih hma chuan an district huamchhunga civil mi silai nei/kawlte chu silai leh silai mu eng chi mah hmang/pai/keng chhuak lo turin an hriattir. Thupek zawm lote chu Bharatiya Nyaya Sanhita (BNS), 2023 Section 223 hmangin hrem theih an ni.

Faina hnatlang

Institute of Bioresources and Sustainable Development (BRIC-IBSD), Mizoram Centre chuan January 30, Ningani khan National Cleanliness Day, 2025 pualin Muthi Park, Aizawlah bawlhhlawh thenfai hnatlang an nei.

PRO training

Lunglei district-a village council 88 leh local council 24-a inthlanpui buatsaih tura presiding officer (PRO) leh assistant PRO-te tan nimin khan Lunglei High School-ah training buatsaih a ni a; master trainer paruk - SDO (Sadar) TT Beikhaizi, DCSO Lalremruata Sailo, JB College asst. prof. Vanlalmuana, Lunglei College asst. prof. Lalthanmawia leh asst. prof. Z Lalthanliana Langva leh Lunglei HSS lecturer C Lalrindika ten thil pawimawhte an hrilhfiah.

Road Safety Month

Siaha District Road Safety Committee chuan nimin khan addl. DC Abraham Beirazi Khithie kaihhruaiin February thla chhunga Road Safety Month hman dan tur an rel. Kumin Road Safety Month thupui chu 'Fimkhur leh him takin lirthei khalh ṭhin ang che' tih niin, Siahaah chuan February chhung hian Transport leh Police department ṭangkawp chuan lirthei an endik ṭhin dawna, zirna-in leh kohhran tinah road safety pledge chhiar chhuah a ni ang.

RDB training

Mamit district registrar of births of death K Laltlawmlova, district bawrhsap hoin nimin khan DRO conference hall-ah Mamit district-a Registrar of Births & Death (RDB)-te tan Civil Registration System 2025 training buatsaih a ni a; Mamit district-ah hian damdawi-in behchhan RBD 10 leh veng/khua behchhan RBD 70 an awm mek a ni.